Federación de Administración Pública da CIG

Federación de Administración Pública da CIG

Ligazóns sectores

Autonómica
Correos
Xustiza

Ligazons confederacion

CIG - Avantar
Forga
Saúde laboral
Fesga

Procurar no web

Novas
Paulo Carril: “Non será posíbel recuperar os dereitos mentres non se derroguen as reformas” PDF Imprimir Correo-e
Venres, 15 Xuño 2018 10:39

A CIG chama a mobilizarse o 19 de xuño para forzar o Goberno a cambiar as políticas que empobrecen e precarizan.

A CIG considera que non será posíbel recuperar os dereitos mentres non se derroguen as reformas laborais, da negociación colectiva ou das pensións. Por iso chama á mobilización o vindeiro día 19 de xuño, “para forzar o Goberno e as forzas que o elixiron a cambiar as políticas que provocaron a precarización e o empobrecemento da clase traballadora ”.

Así o considera o secretario xeral da CIG, Paulo Carril, para quen “as afirmacións da ministra de Traballo confirman que só a través da mobilización lograremos recuperar e avanzar nos nosos dereitos”.

Carril entende que “non valen escusas” e asegura que de igual maneira que houbo unha concertación de forzas políticas para dar fin ao Goberno do PP, “ten que darse coa mesma urxencia unha correlación que nos próximos meses faga posíbel a recuperación dos nosos dereitos”.

Lembra que se acusou ao PP de ter paralizadas unha chea de proposicións de lei que contemplaban a derrogación de moitas destas reformas. Por iso considera que “non é certo” que non haxa sostén parlamentario para derrogalas. “O que hai que ter é vontade”.

Respecto do pacto social advirte de que o acordo interconfederal de negociación colectiva que están negociando CCOO e UGT “en absoluto vai dar solucións para que se recuperen os salarios e pode impedir a recuperación dos dereitos lexitimando a reforma laboral, como xa fixeron coa sinatura de acordos anteriores, se se reedita nos mesmos termos que aqueles”.

Ademais asegura que calquera acordo de incremento salarial desligado do IPC e vinculado á produtividade ou o PIB “entendemos que é negativo e leva a que se asente o empobrecemento da clase traballadora, como xa vimos no acordo asinado por CCOO e UGT co goberno no relativo ao SMI, que contradí as demandas que agora se fan respecto das pensións”.

Calendario para rematar co saqueo á clase traballadora

O secretario xeral da CIG entende que o cambio de Goberno ten que levar aparellado tamén un cambio das políticas. Doutro xeito, afirma, “a moción será unha fraude se o cambio de políticos non se acompaña cun cambio de políticas”. Por iso exixe do Goberno un calendario para a derrogación inmediata de todas esas reformas que saquean e rouban á clase traballadora.

Lamenta ademais que CCOO e UGT sigan “sementando a confusión” e asegura que “non hai razóns para desmobilizar, senón todo o contrario”.

XORNADA NACIONAL DE MOBILIZACIÓNS - 19 DE XUÑO

A Coruña: Praza de Vigo, 20h

Cee: Praza 8 de marzo 20h

Ferrol: Praza de España, 20h

Santiago: Praza Roxa, 20h

Pontevedra: Praza da Ferreiría 20h

Vilagarcía: Casa do Mar, 20h

A Estrada: Praza do Mercado, 20h

Vigo: A Doblada, 20h

Ourense: Edificio Sindical (Parque de San Lázaro), 20h

Lugo: Edificio Sindical (Ronda da Muralla), 20h

Burela: Local CIG (Avda. Arcadio Pardiñas), 20h

Monforte: Praza de España, 20h

As Pontes: Praza do Hospital, 19:30h

A Pobra do Caramiñal: Cantón da Leña, 20h

 
A sección sindical da CIG demanda o Concello da Coruña polo uso irregular das comisións de servizos PDF Imprimir Correo-e
Xoves, 31 Maio 2018 08:55

Sinalan que hai sobre 200 postos cubertos por este método, nun cadro de 1.500 persoas

A Coruña - 25 Mai 2018

A sección sindical da CIG do Concello da Coruña acaba de presentar unha demanda no xulgado do contencioso-administrativo contra a aplicación irregular por parte do Goberno municipal do sistema de comisión de servizos para a provisión dos postos de traballo. A representación sindical explica que se ben o uso da figura da comisión de servizos para a cobertura das vacantes non é algo novo no Concello, "o certo é que este Goberno estao levando ao extremo, convertendo algo que debería de responder a motivos de urxencia e necesidade en algo habitual".

O secretario da Sección Sindical, José María Calatayud, lamentou que o Goberno local se preste a promover o que cualificou como "dedazos", "porque non lle debe gustar o resultado dos concursos, da carreira profesional á que teñen dereitos todos os empregados e empregadas da administración".

Neste momento, sinalou, hai sobre 200 comisións de servizo que representan aproximadamente o 14% do cadro de persoal municipal, composto por unhas 1.500 traballadoras e traballadores. Desas comisións de servizos, arredor de 150 (o 75%) están nunha situación de irregularidade, ao superaren os dous anos máximos que permite a lei para este tipo de provisión de postos.

As medidas adoptadas afondaron no problema

A Sección Sindical da CIG instou o Goberno municipal, "dende practicamente a súa toma de posesión", para que convocaran os concursos e regularizaran á adscrición dos empregados e empregadas municipais aos diferentes postos de traballo. Porén, "lonxe de solucionalo, as medidas que foron adoptando non serviron máis que para afondar neste problema".

Calatayud censurou que o Goberno municipal tratara de darlle unha aparencia de obxectividade a este sistema creando unhas bases para realizar concursos con esta fin, "mais con isto o que conseguiron é que un proceso que debería ser áxil é inmediato (hai que recordar os criterios de urxencia e necesidade) adquira a complexidade do proceso normal de cobertura que é o concurso; pero eliminando a obrigatoriedade de permanecer dous anos no posto acadado polo procedemento habitual e deixando as diferentes áreas administrativas sempre en precario, no relativo ás adscricións dos/as empregados/as a estas mesmas". E en todo caso, alertou, este sistema “obxectivo” non se aplica aos postos de xefatura "que seguen nomeándose á dedo".

Ademais, denuncian que non se están aplicando, nin sequera na utilización deste sistema, criterios xenéricos para todo o persoal, "pois a unhas persoas césanas cando rematan os dous anos de prazo máximo, a outras non; a unhas adscríbeselle en comisión de servizo por concurso, a outras a dedo, etc. E xa para rizar o rizo, nalgúns casos que se esgotou o prazo máximo de dous anos, cesan a estas persoas un día para volvelas nomear ao día seguinte".

Posíbel fraude de lei

Esta última maneira de actuar, advertiron dende a Sección Sindical, podería constituír unha fraude de lei ou incluso un delito de prevaricación, polo que dende a asesoría xurídica da CIG estase a valorar a posibilidade de poñer estes feitos en coñecemento da Fiscalía.

Neste senso, sinalaron que esta situación non se podería dar se "non houbera traballadores e traballadoras que se prestaran". "É certo que existe dentro do colectivo dos/as empregados/as do Concello algúns grupos que contribúen a manter esta situación, algúns/has non teñen ningún reparo en acudir á xustiza cando se senten prexudicadas/os, reclamando cuestións de legalidade e despois esquecen a aplicación desta legalidade cando son eles/as os/as beneficiados/as destas arbitrariedades, esquecéndose incluso dalgunhas resolucións xudiciais que no seu momento lles dáballes a razón, anulando algunhas coberturas feitas polo Concello".

 
Razóns para a folga xeral: defender o sistema público para termos unhas pensións dignas hoxe e no futuro PDF Imprimir Correo-e
Mércores, 23 Maio 2018 10:44

Miles de persoas mobilízanse coa CIG para esixir derrogar as reformas de 2011 e 2013

O sistema público de pensións é unha conquista da clase traballadora a través de décadas de loita. A través da loita é como temos que evitar que nolas rouben e por iso a CIG volveu saír este martes ás rúas de 18 cidades e vilas galegas para esixir a derrogación das reformas das pensións de 2011 e 2013, das reformas laborais e da negociación colectiva. A defensa dunhas pensións dignas é outra das moitas razóns polas que a CIG ten convocada folga xeral para o 19 de xuño, porque a folga xeral constitúe “a arma máis poderosa que temos para defender as pensións públicas” e os dereitos roubados á clase traballadora galega.


As medidas anunciadas nos Orzamentos do Estado -que aínda se descoñece se o PP poderá sacar adiante- non son máis que parches, que perpetúan o roubo ás pensións, pero que non solucionan "ningún dos graves problemas que trouxeron as reformas das pensións de 2011 e 2013". De saír adiante o acordo dos orzamentos, adiarase a entrada en vigor do denominado factor de sustentabilidade, pero non se suprime, o que implicará que, se non somos quen de impedilo, as futuras pensións poderanse ver reducidas até nun 20% a conta das mentiras sobre o aumento da esperanza de vida, pois canto máis maiores, pensións máis pobres teremos.

Por mor das reformas de 2011 e 2013 dificúltase cada vez o acceso as pensións contributivas, diminúen as contías das pensións de que en accede ao sistema e atrásase a idade efectiva de xubilación. Neste senso, non cómpre perder de vista que máis da metade das pensións galegas son inferiores ao salario mínimo interprofesional e temos as pensións máis baixas do Estado.


A folga xeral é nosa resposta

Logo de anos de saqueo á  clase traballadora, agora o Goberno de Rajoy pretende facernos crer que as pensións públicas non son viábeis e que hai que complementalas con aforro e con pensións privadas. Non podemos caer nesta trampa.

É a administración quen debe garantir unhas pensións públicas dignas. E pode facelo, non é un problema económico o que llo impide, só é precisa vontade política. O sistema público de pensións en Galiza, ou mesmamente un sistema público galego, é posíbel, viábel e capaz por si propio.

Dende a CIG levamos anos denunciando esta situación e incluso convocamos folga xeral en 2011, mentres UGT e CCOO aprobaban a reforman aplicada polo Goberno de Zapatero.


E por iso esiximos un sistema público de pensións que garanta que as pensións de hoxe e as de mañá, sexan dignas e se poida acceder a elas en equidade e sen obstáculos. Mais iso só será posíbel coa derrogación das reformas das pensións e laborais e un cambio radical nas políticas económicas e sociais aplicadas até agora, que só xeran pobreza e explotación laboral.

De aí que a CIG aposte pola mobilización e por convoca folga xeral para o vindeiro 19 de xuño. A folga xeral constitúe a arma máis poderosa que a clase traballadora ten para defender as pensións públicas, pero tamén como mellor defensa ante a próxima reforma que están a cocer no chamado pacto de Toledo.

 
A suba salarial no sector público só permite recuperar o 0,48% anual, até 2020, do poder adquisitivo perdido PDF Imprimir Correo-e
Mércores, 14 Marzo 2018 11:24

O persoal das Administracións tardaría 28 anos en restablecer o recortado nos últimos oito anos

A Área Pública da CIG (CIG-Administración, CIG-Ensino e CIG-Saúde) non subscribirá o acordo entre o Ministerio de Facenda e as organizacións sindicais estatais CCOO, UGT e CSIF que se prevé que se asine na Mesa Xeral das Administracións Públicas convocada para mañá mércores, día 14 de marzo, nin polo fondo, nin polas formas. Denuncia a pretensión de desvincular os salarios do persoal das Administracións públicas do IPC; que ese acordo só permitiría recuperar un 0,48% anual do poder adquisitivo perdido até 2020 e que, de se manteren os criterios marcados, o persoal das administracións públicas tardarían 28 anos en recuperar o que foi recortado nos últimos 8 anos. Rexeita ademais que se pactara, como en ocasións anteriores, fóra das mesas de negociación.

O portavoz da Área Pública da CIG, Xavier Picón, asegura que ademais de non recuperarse o poder adquisitivo perdido, tampouco se recuperan as prazas de emprego público recortadas, nin os dereitos laborais suprimidos. “Mantense tamén intacta toda a lexislación restritiva de dereitos de participación e negociación colectiva, facendo táboa rasa de todas as reivindicación sindicais”. Toda unha serie de cuestións ás que, afirma, “non pode renunciar a Área Pública da CIG”.

Pacto fóra das mesas

Picón denuncia que o texto do documento foi acordado polas cúpulas sindicais e gobernamentais “sen publicidade nin contraste coas traballadoras e traballadores do sector público, á marxe da mesa de negociación e mantendo vellas prácticas desgraciadamente consolidadas tanto no bando sindical como no do goberno”.

De feito acusa a CCOO, UGT e CSIF de se converter en “cómplices dun Goberno que, lonxe de recoñecer o esforzo soportado durante a crise e restituír os dereitos e as condicións de traballo suprimidos relega ás persoas empregadas públicas ao papel de vítimas permanentes dunhas políticas contrarias aos intereses da clase traballadora en xeral e das persoas empregadas públicas en particular”.

Desvinculación do IPC

A Área Pública da CIG considera moi grave que, no documento, as organizacións sindicais accedan a pactar incrementos salariais que “xa non se indexarán en función da carestía da vida, senón en función da evolución da economía global española”. Un precedente que Picón cualifica de “pernicioso” porque o PIB “só reflicte o incremento do valor monetario dos bens e servizos, desligándose da evolución dos prezos do noso consumo diario e sen establecer antes criterios de reparto igualitario deses beneficios”.

Alerta ademais de que iso foi precisamente o que se fixo coas pensións públicas –desligar o seu incremento ao IPC- e que provocou unha importante perda do seu poder adquisitivo e unha contestación social sen precedentes das persoas pensionistas.

Deste xeito a Área Pública da CIG calcula que nos próximos tres anos as retribucións do persoal público se incrementarían nun 6,12% (con subas de 1,75%; 2,25% e 2% en cada exercicio). A maiores fíxanse uns posíbeis incrementos vinculados ao PIB. Porén, “segundo as estimacións do Banco de España de decembro de 2017, o PIB non superará o 2,1% nos anos 2019 e 2020, polo que no mellor dos casos esas subas poderían chegar, como máximo, ao 6,38%”.

Ademais, segundo eses mesmos informes do Banco de España, o IPC destes tres anos (2018 a 2020) experimentará un incremento do 4,67%. “Isto implica que parte da recuperación do noso poder adquisitivo se limitará a un 0,48% anual, ou 0,57%, no mellor dos casos)”.

A Área Pública da CIG ten en conta ademais o desfase de poder adquisitivo mínimo desde 2010, que foi dun 13,20% no Estado, polo que o funcionariado e o persoal laboral público tardaría 28 anos en recuperar o que lle foi arrebatado polos diferentes gobernos.

“Esta recuperación sería moito máis lenta en administracións como a galega”, sinala Pincón, porque “a Xunta foi máis agresiva que a propia administración central nos recortes ao seu persoal, mantendo complementos específicos das extras recortados até o ano 2017 e onde o acumulativo do IPC foi lixeiramente superior ao do Estado”.

Por iso para a Área Pública da CIG é “unha auténtica tomadura de pelo ás persoas empregadas públicas que se nos fale de recuperación de poder adquisitivo en relación ao perdidos nos últimos 8 anos”.

Fondos adicionais

Respecto dos fondos adicionais que se contemplan no acordo e que se poderían negociar e incrementar nas diferentes administracións públicas, Picón explica que son fondos con carácter finalista polo que “a súa distribución pode afectar de xeito desigual aos distintos colectivos, grupos ou escalas de empregados/as públicos/as”.

En todo caso, a CIG entende que cada administración debe poder chegar a acordos retributivos sen estar condicionada por acordos e inxerencias do goberno e as cúpulas sindicais estatais xa que, do contrario, “se está a negar a capacidade de negociación das organizacións sindicais e das administracións en cada ámbito de negociación”.

Propostas da CIG

A Área Pública da CIG xa adianta que presentará as súas propias propostas  e defenderá unha suba adicional sobre o acordo acadado entre o goberno e os sindicatos estatais dun 4,40% en 3 anualidades, para recuperar o 13,20% do poder adquisitivo perdido no período 2010.2017, incluíndo unha cláusula de garantía salarial por desviación do IPC.

Demandará ademais a derrogación das normas implantadas polo goberno central que provocaron un grave deterioro das condicións laborais, nomeadamente a penalización por enfermar, porque no acordo “o único que se recolle é que as diferentes comunidades autónomas poderán regular as condicións a cumprir para completar até o 100% nas baixas por IT”.

Reclamará tamén a recuperación de dereitos perdidos que no documento non aparecen e a xubilación parcial que non se amplía ao funcionariado do réxime xeral. Xunto a isto reclama que se inclúa a recuperación dos Fondos de Acción social; o fin dos recortes nas pagas extra nos conceptos de salario e trienios; dos permisos e licenzas suprimidos; da restitución da parte dos convenios colectivos suspendidos ; da implantación do sistema de carreira horizontal ou da clasificación  do persoal titulado de FP2 no grupo B e de FP1 no grupo C1.

Sen creación de emprego

Para a Área Pública da CIG o texto incluído neste acordo supón unha ampliación do Acordo sobre estabilización do Emprego Público que a CIG xa rexeitou no seu momento porque non recupera emprego público perdido entre 2010-2017 e que se cuantifica en 270.000 postos de traballo no conxunto do Estado, 12.000 deles en Galiza. En todo caso Picón matiza que se está a falar de “prazas estruturais que xa están ocupadas na actualidade, nuns casos por persoal temporal ou interino e noutros por persoal indefinido non fixo por sentenzas que, en ningún caso, implican incremento real de prazas nos cadros de persoal”, matiza Xavier Picón.

Por iso a Área Pública da CIG conclúe que “malia a tan cacarexada mellora da situación económica, o mantemento das taxas de reposición non permite crear emprego no sector público, nin recuperar as prazas perdidas nos últimos anos nestes ámbitos. “Isto vai seguir xerando emprego temporal e inestábel e, nalgúns casos en fraude de lei, co agravante de que agora as taxas xa non veñen impostas, senón que son froito de acordo coas organizacións sindicais estatais”.

 
"Seguir coa folga non é un capricho, cada día que pasa perdemos cartos" PDF Imprimir Correo-e
Xoves, 01 Marzo 2018 17:31

CIG-Xustiza chama a secundar masivamente a manifestación deste sábado en Compostela

Nacional - 22 Feb 2018

O próximo sábado, 24 de febreiro, as traballadoras e traballadores da administración de Xustiza volverán manifestarse en Compostela para esixir a fin das discriminacións laborais e salariais e a dotación dos cadros de persoal necesarios para prestar un servizo de calidade. Dende o sector de Xustiza da CIG faise un chamamento a todo o persoal a participar na marcha que sairá ás 12:00 horas dende a Alameda e rematará na Praza da Quintana.

A marcha realizarase tras a ruptura das negociacións coa Xunta "que está seguindo unha estratexia de desgaste e manipulación a través dos medios" e da demanda, por parte do comité de folga, dunha nova interlocución que permita desbloquear o conflito e que non inclúa a presenza do Director Xeral de Función Pública, a quen o secretario do sector de Xustiza da CIG-Administración, Xesús H. Sánchez, volveu culpar de dinamitar calquera posibilidade de alcanzar un acordo.

Tanto é así que foi tras da entrada da Consellaría de Facenda na mesa de negociacións cando se enquistaron as conversas e se eliminou a mediación do Consello Galego de Relacións Laborais. "E a pesar de que solicitamos varias veces a presenza do CGRRLL na mesa, a Xunta negouse a aceptar a mediación", aclara.

Hoxe mesmo, ducias de empregados/as de Xustiza meteron escritos no rexistro da Xunta solicitando a dimisión do Director Xeral de Función Pública polas súas declaracións irresponsábeis emprazando o persoal a emigrar fóra de Galiza "se non están contentos/as".

"A folga non é un capricho, a nós cústanos cartos"

Sánchez criticou a Xunta por pretender trasladar a imaxe do persoal desta administración como un colectivo de privilexiados e privilexiadas e lembroulle que para os traballadores e as traballadoras estar de folga non é un capricho, senón que lle supón un enorme esforzo económico, pois os días de paro "nin cobramos os salarios" nin se cotiza á Seguridade Social por esa persoa. Cuestións estas que o Goberno galego parece esquecer sempre nas súas valoracións públicas sobre o conflito.

Nun cálculo rápido, sinala que, de media, cada traballador/a pode estar perdendo ao día uns 70 euros (unhas persoas máis e outras menos, en función do corpo ao que pertenza). "Se iso o multiplicas polos días que levamos en folga, podemos estar falando de arredor de 800 euros de salario perdido". "Se á súa vez, esta cifra se multiplica polo número de traballadores/as en folga entón xa estamos falando de moitos centos de miles de euros que a Xunta vai aforrar en salarios", subliña Sánchez.

Lembra que a Xunta de Galiza contribúe só ao pago dunha parte do Complemento Autonómico Transitorio (CAT), pero que o groso das nóminas "vén de Madrid, e que, aínda que esteamos en folga, non vai deixar de pagarlle á Xunta. O que nos gustaría saber é que destino lle vai dar a Consellaría a eses cartos que se aforran", pregúntase.

A este respecto, o secretario da CIG-Xustiza desmentiu as informacións aparecidas nalgún xornal nas que se fala "duns salarios moi por enriba dos que realmente cobramos. Poñen como exemplo a nómina dun xestor xudicial que é irreal, pois se comparamos as cifras que aparecen nesa noticia coa orde de nóminas recollida no DOG, vemos que hai unha diferenza de 8.000 euros por debaixo do que se afirma nese periódico".

"A xustiza xa estaba colapsada antes de comezar a folga"

Subliñou Sánchez que con esta folga o persoal está defendendo os seus dereitos, mais tamén loitando contra o desmantelamento da xustiza galega, e varios dos puntos da táboa reivindicativa van destinados a reverter o proceso de amortización de prazas aplicado en 2013 e para acadar a consolidación das prazas de reforzo con máis de tres anos.

A Xustiza galega xa estaba colapsada antes de comezar a folga e agora estanse suspendendo todos os días centos de xuízos e procedementos, polo que parece unha auténtica irresponsabilidade a actitude da Xunta, que en vez de buscar vías de diálogo, "quere presentarnos como os culpábeis de todo e botar a opinión pública enriba de nós".

"Sabemos que é difícil loitar contra isto, por iso imos facer repartos de follas informativas nas rúas desmontando as mentiras da Xunta", adiantou Sánchez.

Pulso mobilizador

Así as cousas, o persoal mantén o pulso mobilizador a diario. Se onte organizaban un almorzo solidario en Vigo, hoxe as e os compañeiros da Coruña manifestábanse polas rúas da cidade, mentres en Lugo se visitan os xulgados das vilas para informar da situación do conflito e chamar a participar na marcha do sábado en Compostela.

 
A CIG formaliza a presentación da folga de mulleres do 8 de Marzo PDF Imprimir Correo-e
Luns, 05 Febreiro 2018 12:47

A central sindical chama a secundar os paros laborais de dúas horas por quenda de traballo e as mobilizacións convocadas para esa data

A CIG formalizaba este luns no rexistro da Consellaría de Economía, Emprego e Industria a convocatoria da folga de mulleres que terá lugar o 8 de Marzo en Galiza, no marco dunha xornada internacional de paros e mobilizacións para reivindicar a igualdade de oportunidades entre mulleres e homes nas condicións de traballo, na esfera social e o dereito a vivir sen violencia.

A folga, que afectará a todas as actividades e centros de traballo de Galiza, tanto das empresas privadas como do sector público, farase efectiva nas franxas horarias comprendidas entre as 00h e ás 02 horas, das 12 a 14 horas e das 19:30 a 21:30 horas; é dicir en paros laborais de dúas horas por quenda de traballo.

A secretaria confederal de mulleres da CIG, Margarida Corral, quen acudiu ao rexistro acompañada pola Comisión de Mulleres da CIG e o secretario xeral, Paulo Carril, explicou que a decisión de convocar paros laborais responde ao debate iniciado en novembro de 2017 nos diferentes organismos da central sindical, nos que se acordou que o 25 de novembro (Día Internacional para a eliminación da violencia contra as mulleres) se iniciase a conta atrás para a consecución o 8 de Marzo de 2018 dun Paro Internacional de Mulleres. Unha folga, en palabras de Margarida Corral, “que rache coa hipocrisía no que se están a converter a celebración de datas senlleiras vinculadas cos dereito das mulleres, recuperando o carácter reivindicativo e de clase que ten o 8 de Marzo, Día Internacional da Muller Traballadora”.

Chamada a participar nas mobilizacións

A concreción das horas dos paros obedece á intención de facilitar que todas as mulleres poidan participar na folga sexa cal sexa o seu horario laboral e ao tempo, nas mobilizacións que se convoquen durante esa xornada.

A propia CIG -ao igual que vén facendo cada 8 de marzo- desenvolverá ese día concentracións nas sete cidades galegas. Ademais, intentarase estender a convocatoria de mobilizacións ao maior número de vilas posíbel, para facilitar a participación das mulleres que non poidan desprazarse nesta xornada reivindicativa. Naqueles lugares onde non sexa posíbel convocar actos de protesta, a central sindical chama as mulleres que secunden o paro laboral a saír ás portas dos seus centros de traballo con carteis e simboloxía alusiva á folga.

Ler máis...
 
8 de Marzo: camiñando cara á folga internacional de mulleres PDF Imprimir Correo-e
Luns, 22 Xaneiro 2018 14:00

A CIG convoca asembleas de delegadas e afiliadas en todas as comarcas do país para coñecer e debater as mobilizacións previstas

Dende o 16 ao 30 de xaneiro, a CIG vai realizar asembleas de delegadas e afiliadas en todas as comarcas do país para dar a coñecer e debate arredor da convocatoria de folga de mulleres do vindeiro 8 de marzo, Día Internacional da Muller Traballadora.

A CIG convoca esta folga no marco do paro internacional de mulleres que se desenvolverá en máis de 50 países do mundo o 8 de marzo, para reivindicar a igualdade de oportunidades entre mulleres e homes nas condicións de traballo, na esfera social e o dereito a vivir sen violencia.

Calendario de asembleas xa confirmadas

A Mariña, luns 22 de xaneiro, no local sindical de Burela.

Ferrol, martes 24 de xaneiro, ás 10h e ás 20h no local sindical.

Vigo, mércores 24 de xaneiro, no local sindical.

Santiago, mércores 24 de xaneiro, no local sindical.

A Coruña, xoves 25 de xaneiro, no edificio sindical.

Lugo, martes 30 de xaneiro, ás 11h e ás 18h, no local sindical.

Ourense, pendente de concretar data.

*En Pontevedra, a asemblea celebrouse o martes 16 de xaneiro.


Reivindicando os dereitos das mulleres

A CIG fai un chamamento a secundar este paro de mulleres para seguir reivindicando neste 8 de Marzo que queda moito por facer pola igualdade e por visualizar a contribución de todas as mulleres ao mundo. Unha folga que permita visibilizar a situación que padecen as mulleres, para esixir a mellora das súas condicións sociolaborais e a fin das discriminacións laborais (fenda salarial, atrancos nos dereitos de conciliación, acoso laboral, sexual e por razón de sexo e identidade, xornadas parciais, dobre xornada, chan pegañento, etc.); mais tamén para que se adopten medidas inmediatas para rematar coa violencia machista (sexual, agresións, feminicidios) e o resto das discriminacións.

Neste senso, a Secretaría das Mulleres da CIG explica que alén do paro laboral, con esta convocatoria tamén se fai un chamamento ás mulleres para que se absteñan de asistir ás clases, de realizar traballos domésticos ou de coidado, e ao tempo, realizar un boicot permanente ás empresas con políticas misóxinas.

 
Arquivan a denuncia da CIG malia recoñecer ilegalidade na xestión dos helicópteros de incendios PDF Imprimir Correo-e
Luns, 22 Xaneiro 2018 13:58

Limita as posíbeis responsabilidades unicamente ao ámbito administrativo

O titular do Xulgado de Instrución nº 3 de Santiago de Compostela vén de arquivar provisionalmente a causa aberta a raíz da denuncia que a CIG-Administración Autonómica presentou na Fiscalía no ano 2012 pola adxudicación a dedo da contratación do servizo de helicópteros e brigadas as empresas Inaer e Natutecnia, respectivamente. Para o sector estamos diante dun "exercicio de surrealismo xudicial" xa que esta denuncia foi refrendada polas irregularidades que o Consello de Contas detectou nese e noutros contratos nos que o denominador común é a presencia en todos eles de Inaer.

Pese a recoñecerse no auto que a Xunta cometeu unha ilegalidade na citada contratación, a Xustiza non ve indicios de prevaricación e limita as posibles responsabilidades ao ámbito administrativo.

O xuíz utiliza como argumentación para xustificar a adxudicación a Inaer a excepcionalidade do momento e o feito de que esa empresa xa fora a adxudicataria nos concursos anteriores e posteriores ao do ano 2012, mais obvia un detalle moi importante. Nese ano 2012, por primeira vez, o contrato contemplaba o Servizo integrado de helicópteros e brigadas, aspecto este último totalmente novidoso con respecto aos contratos anteriores.

Nese senso, o sector da CIG-Autonómica lembra que na denuncia presentada pola central sindical se anunciaba, con case un ano de antelación, a adxudicación a dedo a Inaer do servizo dos helicópteros e a “subcontratación” do servizo das brigadas a Natutecnia, como así aconteceu. Este último aspecto é crucial porque até ese momento as brigadas eran propias do Servizo de Prevención e de Defensa contra Incendios Forestais (SPDCIF).

Cuestiona o auto xudicial

Ler máis...
 
O persoal de xustiza está chamado a mobilizarse en Santiago o 25 de xaneiro PDF Imprimir Correo-e
Luns, 22 Xaneiro 2018 13:57

Coincidindo coa nova xornada de folga convocada no sector

Á espera de que se produza unha nova reunión entre a representación social e a Xunta de Galiza, o comité de folga continúa adiante coa convocatoria do paro xeral na administración de xustiza galega do vindeiro xoves 25 de xaneiro. Coincidindo coa folga, para ese día está convocada tamén unha manifestación en Santiago de Compostela, á que están chamados/as a participar os 2.500 traballadores e traballadoras do sector. A marcha sairá ás 12:00 horas da Avenida Xoán XXIII e rematará diante do Parlamento, na rúa do Hórreo.

"A convocatoria de folga e de manifestación segue activa e non se vai desconvocar até que haxa un acordo satisfactorio para todas as nosas demandas", apunta Óscar Freixido, representante da CIG nas negociacións coa Dirección Xeral de Xustiza. Neste senso, explica que se está á espera de concretar a data dunha nova reunión (coa mediación do Consello Galego de Relacións Laborais) á que a Consellaría debería traer, cando menos, unha contraoferta en materia económica. Esta xuntanza poderíase producir a finais de semana.

Distanciamento importante

Ler máis...
 
O sector de Xustiza da CIG-Administración reelixe a Xesús Sánchez como secretario nacional PDF Imprimir Correo-e
Luns, 22 Xaneiro 2018 13:53

 

Na VII Asemblea escolleuse tamén a nova dirección nacional

A VII Asemblea Nacional do Sector de Xustiza da CIG-Administración, celebrada o sábado 20 de xaneiro, reelixía a como secretario nacional a Xesús H. Sánchez Costa (Tuto), nun proceso no que tamén se procedeu a renovar a dirección nacional. Na asemblea deuse conta das actuacións do sector nestes últimos anos e analizáronse as accións futuras, tanto a curto como a longo prazo, "tendo en conta o escenario de confrontación e de perda de dereitos debidos á mala xestión da Xunta de Galiza e as vindeiras eleccións sindicais do ano 2019".

Deste xeito, a nova dirección queda conformada por Xesús H. Sánchez Costa (Tuto), Óscar Freixedo Beltrán, Eva Rodríguez Vicente, Delmiro Durán Garrido, Chelo Rodríguez Rodríguez, Xosé Barreiro Pérez, Antonio Ayaso Reiriz e María Carmen Bergantiños Vázquez.

Defender os dereitos de todas e todos os traballadores

O novo secretario nacional debullou polo miúdo, nun informe que foi aprobado por unanimidade, as actuacións apoiadas polo sector, tanto ante a Xunta de Galiza como ante o Ministerio de Xustiza, salientando as grandes dificultades habidas nestes catro anos no diálogo con PP, "partido que, engadiu, goberna tanto en Galiza como en Madrid, resultando, con diferenza e paradoxalmente, máis difíciles os contactos coa administración autonómica que coa central".

O reelixido secretario nacional sinalou que afronta esta nova etapa con ilusión, "dada a incorporación dun delegado e unha delegada nova que realizarán as súas funcións en Compostela e Ourense: Antonio Ayaso Reiriz e Manuela Mares Iglesias. "De seguro apuntalarán a acción sindical da CIG nesas vilas, dado o escenario de grandísima disgregación do voto sindical, ao existir en xustiza até sete centrais sindicais que concorren aos procesos electorais, das cales varias son corporativistas".

A CIG-Xustiza comeza esta nova etapa "coa experiencia, seriedade e coherencia que lle dan todos estes anos de permanencia nas mesas sectoriais de Galiza e Madrid, defendendo os intereses de todas/os as traballadoras/es da Administración de Xustiza de Galiza".

 
A CIG segue a mobilizarse en demanda da readmisión do traballador despedido do GES de Guitiriz PDF Imprimir Correo-e
Martes, 12 Decembro 2017 11:56

Entrevistarase o vindeiro luns co Subdirector Xeral de Protección Civil

O vindeiro luns está prevista unha entrevista co Subdirector Xeral de Protección Civil na que a CIG demandará a intervención da Xunta polo despedimento dun traballador do Grupo de Emerxencia Supramunicipal (GES) en Guitiriz. A central sindical entende que a administración autonómica “ten algo que dicir neste caso” porque, segundo explica o secretario de Organización da CIG en Lugo, Lois Neto, aínda que a contratación é municipal, paga o 50% e ademais é responsábel da coordinación das emerxencias. Na xuntanza exporáselle tamén a situación e as deficiencias do servizo no concello.

Neto asegura que este despedimento é unha represalia polas denuncias que o traballador interpuxo contra os incumprimentos nas condicións laborais do persoal do GES e deste traballador en particular e está seguro de que gañará a nulidade no xulgado. Por iso entende que debería ser xa readmitido.

Deficiencias na atención ás emerxencias

O secretario de Organización da CIG de Lugo denuncia ademais que non se pode manter a este traballador despedido cando o concello está incumprindo os mínimos de traballadores que debería ser de 12 cando só hai, na actualidade 10. “Esta situación, máis alá das cuestións laborais, incide na calidade do servizo. Agora están dando vacacións e hai veces que só está cuberto cun único operario”, explica Neto quen advirte que “isto está afectando tanto a atención das emerxencias como aos tempos de resposta”.

De feito lembra que hai outro traballador que tamén foi despedido e gañou a nulidade, pero que está na súa casa porque o concello presentou recurso perante o Tribunal Superior de Xustiza de Galiza e non o reincorporou á espera de que se dite sentenza.

O pasado xoves, coincidindo coa celebración do pleno, a CIG concentrouse diante da casa do concello, onde se debatía unha moción do BNG en demanda da readmisión deste traballador. Neto anuncia que continuarán as mobilizacións no mes de decembro, tanto diante da Xunta como da Deputación, que son quen pagan, ao 50% o servizo.

 
A primeira xornada de folga na Administración de xustiza galega rexistra un seguimento do 85% PDF Imprimir Correo-e
Martes, 05 Decembro 2017 13:48

Dende a CIG valoran moi positivamente a incidencia do paro e salientan o éxito das mobilizacións celebradas nas sete cidades

O primeiro día de folga dos dous convocados na Administración d

Os sindicatos convocantes, entre eles a CIG, explicaron que decidiron continuar adiante coa folga, á que estaban chamados/as uns 2500 traballadores/as, ante a falta de negociación por parte da Xunta de Galiza. Se nada cambia, o vindeiro día 13 de decembro terá lugar unha nova xornada de paro.

Dende o sector de Xustiza da CIG-Administración cifraron nun 85% o seguimento da folga, que provocou o peche de numerosos centros de traballo como Xulgados e servizos de notificacións e de atención ao cidadán. Ademais, salientaron o éxito das mobilizacións convocadas nas sete cidades galegas, en especial as manifestacións que tiveron lugar en Vigo e na Coruña.

A maior porcentaxe de seguimento rexistrouse en Vigo e Pontevedra, cun 95%, mentres que na Coruña e en Ourense foi do 90%. En Lugo, Ferrol e Santiago esta cifra atinxiu o 75%. Pola súa banda, a Xunta rebaixou o seguimento do paro até o 50%, un dato considerado “totalmente falso” polas centrais convocantes.

Por unhas condicións laborais dignas

Entre os principais motivos que levaron á convocatoria de folga citan “unhas condicións laborais dignas de denunciar, con falta de medios humanos e materiais”.

Neste senso, lembran que nos últimos anos, mentres os expedientes aumentaban, reduciuse persoal e non se crearon novos Xulgados. “A isto hai que sumar que somos a Administración máis arcaica de todo o Estado, con sistemas informáticos impropios do século XXI”, indica o responsábel da CIG-Xustiza, Xesús Sánchez Costa.

Ao mesmo tempo, sinala que o persoal de xustiza galego é o segundo que menos cobra do conxunto do Estado, “ademais de permitirse que nun mesmo centro de traballo coexistan persoas ocupando o mesmo tipo de posto e desenvolvendo as mesmas funcións pero cobrando distinto”.

A isto hai que sumar que, a diferencia do que sucede noutras partes do Estado, as baixas por enfermidade son castigadas con descontos salariais sen que a praza desocupada se cubra por outra persoa, producíndose un enriquecemento da Administración que non reverte na mellora do servizo.

“Todo isto repercute moi negativamente non só nos traballadores/as, senón tamén nos cidadáns/ás, xa que nestas condicións é moi difícil que o sistema xudicial funcione correctamente e que a xustiza sexa un verdadeiro servizo público, áxil e eficaz”, polo que que insta a rematar dunha vez coa discriminación do sector en Galiza.

 
VII Congreso da CIG-Administración Pública - Resumo PDF Imprimir Correo-e
Martes, 28 Novembro 2017 14:08

Ligazón do resumo VII CONGRESO DA CIG-ADM PÚBLICA

 
O VII Congreso da CIG-Administración elixe a Xabier Picón como novo secretario nacional PDF Imprimir Correo-e
Luns, 27 Novembro 2017 13:18

Desenvolveuse este sábado en Ferrol baixo o lema “Servizos Públicos, Soberanía, Democracia”

Ferrol - 25 Nov 2017

O VII Congreso da CIG-Administración Público elixiu este sábado a Francisco Xabier Picón Picallos como novo secretario nacional, en substitución de Maricarme López Santamariña. A candidatura de Picón, a única que se presentou para a Secretaría Nacional, obtivo 144 votos a favor, 20 en branco e 3 nulos. No proceso, que se desenvolveu en Ferrol baixo o lema “Servizos Públicos, Soberanía, Democracia”, tamén se escolleu á nova Executiva Federal e aos membros que representarán a federación no Consello Confederal.

Composición da Executiva Federal

A nova Executiva Federal, á que se presentou unha candidatura de consenso encabezada por Xabier Picón, recibiu 150 votos a favor, 11 en branco e 6 nulos.

1.-Francisco Xabier Picón Picallos
2.-María Carme López Santamariña
3.-Fernando García Fernández
4.-Ana Santomé Santos
5.-Xaime Rey Vázquez
6.-Xosé Barreiro Pérez
7.-Carolina Castro Baamonde
8.-Gerardo Alvaredo Maceda
9.-María Xosé Santos Paz

Picón salienta a unidade "que fai máis forte a Federación"

Tras o reconto de votos e a proclamación de candidaturas, tomou a palabra, xa como novo secretario nacional, Xabier Picón, nunha intervención na que salientou a unidade acadada neste Congreso, "que fai máis forte a Federación e a nosa capacidade de acción sindical".

Ler máis...
 
O persoal da administración de Xustiza inicia mobilizacións para recuperar os seus dereitos PDF Imprimir Correo-e
Venres, 17 Novembro 2017 10:44

As protestas preceden á folga dos días 1 e 13 de decembro

Empregadas e empregados da administración de xustiza de toda Galiza concentráronse este xoves diante dos centros de traballo en rexeitamento "á falta absoluta de negociación" por parte da Xunta para tratar cuestións que entenden fundamentais como os descontos por baixas de enfermidade, a consolidación das prazas de reforzo de máis de tres anos, os plans de amortizacións de prazas, o pagamento do 100% das substitucións ou a recuperación e actualización do complemento autonómico transitorio (CAT).

Sobre este último, dende o sector de Xustiza da CIG apuntan que nestes momento o CAT que perciben as traballadoras e traballadores de Galiza é o de menor contía entre as comunidades con transferencias en xustiza. Pero ademais de ser o máis baixo, nos últimos catro anos, o goberno de Feijoo, no marco do recorte salarial ao conxunto do persoal da administración autonómica, "retirounos a totalidade de dito complemento nos meses de xuño e decembro", sinala Xesús H. Sánchez 'Tuto', secretario nacional do sector de Xustiza da CIG.

Deste xeito, a central sindical calcula que no período 2013-2017 as diferenzas salariais acumuladas con respecto ao persoal de xustiza do resto do Estado poden variar entre os 3.800 e os 10.000 euros, en función do corpo ao que se pertenza. Por iso, unha das demandas dos sindicatos é a subida do complemento transitorio autonómico "que permita recuperar o poder adquisitivo perdido nestes anos".

Pagamento do 100% das substitucións

Outra das reivindicacións das centrais convocantes das mobilizacións (SPJ-USO, CUT, UGT, CSIF, STAJ, CIG e CCOO)  refírese á negociación do pagamento do 100% das substitucións, pois en Galiza o persoal que cubre un posto en substitución vertical non cobra a totalidade do posto que ocupa. "Mentres no resto do Estado se aplica a máxima de a igual traballo, igual retribución, a Xunta distingue entre funcionariado de primeira (neste caso titulares e interinos/as) e funcionariado de segunda (titulares en substitución), roubándolle parte das retribucións correspondentes ao corpo onde desempeñan as súas funcións”, advirten.

Ler máis...
 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 1 de 48
Joomla Templates: by JoomlaShack