Federación de Administración Pública da CIG

Federación de Administración Pública da CIG

Ligazóns sectores

Autonómica
Correos
Xustiza

Ligazons confederacion

CIG - Avantar
Forga
Saúde laboral
Fesga

Procurar no web

Novas
Varias unidades de extinción de lumes traballan sen motobombas polos fallos detectados nos vehículos PDF Imprimir Correo-e
Martes, 23 Agosto 2016 12:23
A CIG-Autonómica alerta dos riscos para o persoal do SPDCIF e exixe a convocatoria do Comité de Prevención de Riscos Laborais para que Medio Rural aclare a situación
O sector da Autonómica da CIG-Administración vén de denunciar que varias unidades dos servizos de extinción de incendios teñen que facer o seu traballo sen poder contar con motobomba debido aos fallos detectados na última remesa entregada á Xunta de Galiza. Alertan da mingua do dispositivo en época de máximo risco e máxima carga de traballo pola inmobilización dos vehículos sen aportar outra solución.
Incendio-motobomba

A CIG-Autonómica denuncia ademais que desde o goberno non contactaron cos representantes dos/as traballadores/as para explicar as causas destes fallos que “afectan á eficacia na defensa dos montes contra a vaga de lumes e que, ademais, están a pór en risco as vidas das traballadoras e traballadores dos servizos de extinción de incendios (SPDCIF), comezando polos condutores das motobombas e continuando con todo o persoal que fai o seu traballo na extinción, ao non contar co apoio destes vehículos”.

Segundo a información da que dispoñen, inmobilizáronse varias destas motobombas nos distritos de Ourense, Deza-Tabeirós, O Condado-Paradanta e Caldas-O Salnés.

“Tivemos coñecemento de que en algún caso o afectado foi o sistema de freado, poñendo en risco a vida tanto de condutos, como dos alí presentes”, explican. Xunto a isto tamén se detectaron problemas na refrixeración do motor, provocando que rebentase o vaso de expansión pola suba da temperatura.

Por iso reclaman a inmediata convocatoria do Comité de Prevención de Riscos Laborais e solicitan que a Consellaría de Medio Rural aclare a situación e explique o que vai facer co resto das motobombas entregadas nesta última remesa ou se aínda as teñen en funcionamento.

 
A CIG denuncia que a actual vaga de lumes é resultado do fracaso da política medioambiental da Xunta PDF Imprimir Correo-e
Mércores, 17 Agosto 2016 15:43
Critica a visión produtivista e especulativa da Lei de Montes e pide un novo Plan Forestal de Galiza
A CIG denuncia que a vaga de incendios que está a padecer o noso país é consecuencia do fracaso da política medioambiental da Xunta, que teima en “aplicar medidas que xa se teñen demostrado ineficaces no pasado e afonda na estratexia de converter Galiza nun deserto sen futuro”. Dende a central critican a visión produtivista e especulativa que introduce a Lei de Montes e reclaman un novo Plan Forestal de Galiza elaborado coa participación de todas as entidades que viven, traballan ou xestionan o medio rural.
Incendio-motobomba

O secretario confederal de Medioambiente da CIG, Anxo Pérez Carballo, lembra que ano tras ano o noso país padece milleiros de lumes forestais que arrasan milleiros de hectáreas, que destrúen o noso patrimonio, que hipotecan o futuro do monte e do rural e que poñen en perigo vidas humanas e vivendas. Mais, segundo denuncia, a Xunta segue a aplicar medidas que xa se teñen demostrado inoperantes no pasado “e afonda na estratexia de converter Galiza nun deserto sen futuro”.

Neste senso, sinala a aprobación dunha Lei de Montes só cos votos a favor do PP e coa opinión en contra dos sectores afectados que se centra unicamente na visión produtivista e especulativa do monte, fomentando o aproveitamento madeireiro en prexuízo doutros usos. Así, sosteñen que facilita a forestación de terras agrarias, o que significa reducir a superficie agraria útil e multiplicar as especies invasoras de crecemento rápido que reporten beneficios a curto prazo.

Ler máis...
 
Advirten sobre o desmantelamento do servizo público contra incendios forestais e o uso privado das bases helitransportadas PDF Imprimir Correo-e
Xoves, 11 Agosto 2016 17:11
A CIG denuncia que o persoal das brigadas está a ser contratado en precario por empresas privadas
O sector de Autonómica da CIG-Administración denuncia que o Goberno de Feijóo segue a avanzar no desmantelamento do Servizo de Prevención e Defensa contra Incendios Forestais (SPDCIF) e critica o uso das bases helitransportadas da Xunta polas empresas privadas. Dende a central advirten que o persoal público das brigadas “con experiencia e preparación” está a ser substituído por outro de empresas privadas sen que haxa ningunha garantía da profesionalidade e que está a ser contratado nunhas condicións de absoluta precariedade laboral, incluída a seguridade.
15-06-11 helicóptero lume

Segundo sinalan dende a federación de Administración da CIG, dende o inicio do seu mandato o actual presidente da Xunta decidiu prescindir da prevención porque ten un custo elevado “e non é un bo negocio para os seus amigos das empresas privadas”. A central critica que o Goberno galego fíe a loita contra os incendios forestais á climatoloxía, “sen facer prevención, desmantelando paso a paso o SPDCIF e regalándolle os contratos suculentos ás empresas amigas”.

Así, lembran que durante anos o persoal das brigadas helitransportadas pertencía á Administración autonómica e contaba con experiencia e preparación para combater os incendios forestais na primeira liña de lume. A propia Xunta, no artigo 3.19 do V Convenio, comprométese ao mantemento das brigadas helitransportadas existentes e inclúe a posibilidade de novas creacións. Mais nos últimos anos a tendencia é facer a contratación mediante empresa privada, relegando as bases da Xunta á mínima expresión.

Este ano, nun chanzo máis no desmantelamento do servizo, as brigadas helitransportadas que aumentaron en relación ao ano pasado tamén serán da empresa privada, na que non hai ningunha garantía da profesionalidade do persoal, contratado nunhas condicións de absoluta precariedade laboral, incluída a seguridade, segundo denuncian. “E para que o negocio destas empresas sexa seguro e abondoso a Xunta pon á súa disposición as bases que construíu e mantén cos seus orzamentos: heliportos, talleres, depósitos, casetas de vixilancia, etc.”, critican.

Negocio para as empresas

Neste senso, lamentan que mentres as brigadas da Xunta teñen unhas bases que en moitos casos non cumpren a normativa de seguridade e saúde laboral, as empresas privadas fan “negocio redondo” utilizando as bases das desaparecidas brigadas helitransportadas. Como exemplo citan o que acontece coas brigadas da empresa pública Seaga en Guntín ou na Fonsagrada, que teñen que utilizar como base unha caseta de obra na que en ocasións a temperatura chega aos 50 graos. “Pola contra, os propietarios das empresas amigas non teñen que gastar nada na construción, aluguer ou mantemento das súas bases porque xa llo pagamos entre todos/as”.

Diante disto, sosteñen que o Goberno de Feijóo ten demostrado que non lle importa nada que arda o monte, que non ten ningunha política definida sobre a explotación, racionalización e mantemento das áreas forestais e que non é capaz de organizar cun mínimo de coherencia o SPDCIF. “O único que lle importa ao presidente é mentir sobre a superficie arrasada polos lumes, ocultar a súa incapacidade para xestionar a loita contra os incendios forestais e regalarlle o negocio aos seus amigos”.

 
O Concello da Fonsagrada bota man da reforma laboral do PP para desfacerse do persoal do GES PDF Imprimir Correo-e
Xoves, 11 Agosto 2016 17:10
Tramita un ERE de extinción despois de que o Xulgado o obrigase a readmitir os despedidos/as
O Concello da Fonsagrada, gobernado polo PSOE, continúa coa súa teima de desfacerse dos traballadores/as do Grupo de Emerxencias Supramunicipal (GES), segundo denuncian dende a Unión Comarcal da CIG de Lugo-A Mariña. Despois de verse na obriga por sentenza xudicial de readmitir a varios/as deles/as tras ser considerados nulos os despedimentos, O Goberno local acólle se agora á reforma laboral do Partido Popular para tramitar un ERE de extinción que afectará ao cadro de persoal no seu conxunto.
RecursoGes

Dende a Unión Comarcal da CIG de Lugo- A Mariña lembran que o persoal dos GES é sufragado ao 100% entre a Xunta e a Deputación Provincial, “polo que non lle acarrea ningún custo ao Concello”. Neste senso, critican que de todos os Concellos galegos o da Fonsagrada foi o único que non renovou o convenio, “dándose a paradoxa de que non vai ter o servizo e sen embargo terá que afrontar un custo duns 120.000 euros” como consecuencia da “xestión neglixente” do Goberno municipal.

“Se para defenderse dos despidos o alcalde dilapidou máis de 16.000 euros na contratación dun avogado estrela, desta vez para tramitar o ERE acude á asesoría xurídica da Deputación, estando así o Concello e Deputación á vangarda na aplicación da reforma laboral do PP”, indicen.

Con todo, consideran que o máis grave é a tramitación do ERE, “feita con absoluta alevosía e nocturnidade, ocultándolla aos traballadores/es afectados/es e xestionada con irregularidades, o que provocou que a propia Xunta se dirixise ao Concello advertindo de irregularidades tales como non especificar cal é a comisión negociadora do ERE, contradicións na relación do persoal municipal ou o comezo de reunións negociadoras antes de comunicar o inicio do expediente ante a autoridade laboral”.

Dende a CIG denuncian tamén a complicidade da representación legal dos traballadores/as do Concello da Fonsagrada, constituida por representantes da UGT e CCOO, “quenes supostamente estiveron a negociar un ERE sen comunicar nada afectados/as”.

Diante disto, instan novamente o Concello da Fonsagrada a que recapacite e volva á normalidade asinando o convenio do GES e dando traballo aos empregados/as despedidos/as, “e que dunha vez por todas deixe de andar a maniobrar con falcatruadas que resultan ser ilegais e cuxo custo teñen que asumir todos os veciños/as do concello.

 
A CIG denuncia que a Xunta adianta o pago de parte das extras de 2012 e 2013 para beneficiar electoralmente o PP PDF Imprimir Correo-e
Xoves, 11 Agosto 2016 17:10
O Diario Oficial de Galiza recolle a devolución das pagas adebedadas ao persoal público
O Diario Oficial de Galiza (DOG) recolle este pasado venres o abono das pagas extraordinarias do persoal que traballa para a Xunta, tanto o último prazo da extra de decembro de 2012 como a devolución de 1/6 do específico da paga de verán de 2013. Dende a Área Pública da CIG (federacións de Administración, Ensino e Saúde) denuncian que se trata dun acto electoralista que busca beneficiar o Partido Popular de cara aos próximos comicios autonómicos.
Xunta de Galiza

Segundo explican dende a CIG, o pago das extras realizarase durante o mes de agosto e a forma escollida será similar ás devolucións efectuadas coa paga de 2012, “debendo os interesados/as que no estean en nómina neste momento facer a reclamación correspondente”.

Para a central, este anuncio e o cambio de calendario na devolución de parte das pagas extraordinarias “roubadas” aos traballadores/as públicos está feito con fins electoralistas. “O señor Feijóo xa ten data para as eleccións autonómicas, e tal e como vén facendo antes de cada proceso electoral o mes anterior á votación dá orde de pago dalgunha cantidade das que adebeda das nóminas do seu persoal”, critican.

Diante disto, dende a CIG-Área Pública denuncian unha vez máis o uso “electoralista” que o Goberno do PP segue a facer coas devolucións das pagas extras. Así mesmo, lembran que esta devolución responde á multitude de sentenzas gañadas pola central sindical e ratificadas mesmo polo TSXG, “que declarou ilegal o recorte levado a cabo con carácter retroactivo”. Finalmente, sinalan que a Xunta continúa a adebedarlle ao seu persoal parte das pagas extras dos anos 2013, 2014, 2015 e 2016.

 
CIG reclama medidas para recuperar os niveis de emprego público e rematar coa precarización laboral nas administracións PDF Imprimir Correo-e
Martes, 02 Agosto 2016 14:18
A Área Pública remitiu as propostas e reivindicacións ante a “futura” Lei de Orzamentos Xerais do Estado para o ano 2017
A Área Pública da CIG vén de remitir as súas propostas ante a “futura” lei de Orzamentos Xerais do Estado para o ano 2017, que o executivo en funcións está a utilizar como arma propagandística en plenas negociacións para a formación de goberno. En calquera caso, con independencia da cor do próximo executivo ou de que finalmente se prorroguen os orzamentos deste ano, as demandas da central teñen un obxectivo claro: a recuperación dos servizos públicos de calidade e con carácter universal e a reposición dos dereitos e condicións laborais das traballadoras/es das administracións.
DefensaSalariosadmonpublica

As propostas e demandas foron remitidas ao Ministerio de Facenda e Administracións Públicas logo do goberno en funcións solicitar das organizacións sindicais o seu posicionamento “sobre unha lei da que non sabemos nada”. “Nestes momentos descoñecemos quen vai ser a persoa interlocutora por parte da Administración Xeral do Estado na negociación dos orzamentos ou incluso cales serán as liñas xerais da política de xestión do persoal do próximo goberno”, sinala Maricarme López Santamariña, voceira da CIG-Área Pública (Administración, Ensino e Saúde).

Neste senso, López Santamariña engade que “todo o que sabemos é que o goberno en funcións anunciou que os salarios públicos medrarán un 1% en 2017 no caso de que se forme goberno a tempo de elaborar os orzamentos”. Un incremento que considera ridículo tendo en conta a continuada perda de poder adquisitivo do persoal ao servizo das administracións.

Ler máis...
 
CIG-Xustiza denuncia o mal estado de conservación dos xulgados de Corcubión PDF Imprimir Correo-e
Martes, 02 Agosto 2016 14:11
Pingueiras, roturas de tubaxes, humidades ou vibracións son parte das deficiencias
O sector de Xustiza da CIG denuncia o estado deplorábel no que se atopa o edificio xudicial de Corcubión. As roturas de tubaxes son constantes e provocan fugas de auga en diferentes estancias, a máis recente no despacho do fiscal, acontecida a semana pasada e que deteriorou parte do mobiliario e especialmente o falso teito, que presenta varios furados e está inchado en determinadas zonas.
16-08-01 arquivo_1

Outras dependencias do edificio tampouco se libran das fugas, engaden dende CIG-Xustiza da Coruña. No xulgado número 1, situado no primeiro andar, rexistráronse no teito da oficina e, hai un ano, no despacho da xuíza. “Porén, desde a Dirección Xeral de Xustiza da Xunta non se fai nada para remediar esta situación”.

Por outra banda, non son poucas as estancias que presentan focos importantes de humidade nas paredes. É o caso de varios puntos da oficina do xulgado número 1, da sala de vistas deste órgano ou do arquivo do edificio, situado no soto. As humidades, alén de provocar o desprendemento constante da pintura e de pór en risco o material informático e electrónico, constitúen unha ameaza para a saúde dos e das traballadoras.

Ler máis...
 
Incumprimento reiterado da Xunta de Galiza de non cubrir os postos de traballo que ten vacante PDF Imprimir Correo-e
Martes, 26 Xullo 2016 12:31

Dende a CIG Administración denunciamos de novo o incumprimento reiterado da Xunta de Galiza de non cubrir os postos de traballo que ten vacantes, xerados por xubilacións, baixas, excedencias e, o máis escandaloso, a non cobertura de baixa por maternidade.

Na Xefatura Territorial da Consellaría de Medio Ambiente da Coruña levamos moito tempo reclamando a cobertura das baixas por maternidade, cousa que xa sucedeu en máis  Xefaturas Territoriais da Coruña.  Esta non cobertura supón que o incremento de expedientes do departamento de espazos naturais de medio ambiente teña que ser asumido polo resto de traballadores/as do departamento, provocando un considerable aumento de traballo e impedindo axilidade na tramitación dos mesmos.

Mais a maquinaria administrativa é tan sumamente lenta e inzada de trabas burocráticas que para cando resolven a cobertura xa non pode haber substitución por que está a titular de volta. Ata hai ben pouco a cobertura de baixas por maternidade era a única que estaba a administración  obrigada  a cubrir por Lei. A Xunta de Galiza ten regulación concreta para proceder á cobertura de estas baixas e non está a facer uso correcto da mesma.

Máis tendo en conta que as políticas de defensa e cobertura  da maternidade están a ser usadas como bandeira polo partido popular na Xunta de Galiza. Non pode ser que por unha banda o Presidente Feijoo resolva crear unha materia de Igualdade para desenvolver na ESO e educar neste valor aos nenos e nenas do País, cousa moi importante, pero que por outra banda non sexa quen de lograr, por falla absoluta de interese, un plano de Igualdade nos Servizos Públicos que sexa exemplo a seguir no resto da sociedade e mesmo no mundo empresarial, onde tantas eivas existen, tamén denunciadas dende esta central sindical en numerosas ocasións.

Mais a realidade demostra que nos Servizos Públicos as e os traballadores seguimos a ter serios problemas á hora de conciliar a vida familiar e laboral. Neste presente que nos toca vivir, ao que non é alleo o señor Presidente, non só temos fillos e fillas menores a cargo, senón tamén, por deficiencias serias nos Servizos Sociais temos a dependentes ou grandes dependentes na casa, casuísticas estas novas que demandan de políticos comprometidos, e non escapistas do mundo real, actual e dramático...

Non nos cabe ningunha dúbida de que Feijoo e un excelente propagandista que lava a face diante duns novos comicios deste xeito, sacando da manga medidas engaioladoras mais de compromiso irrealizábel. A Igualdade con maiúscula hai que demostrala cada día, de cada semana, de cada mes do ano e non con fume, senón con feitos.

 

Teléfono de contacto:

Erea Estevez Campos, Sección Sindical da CIG na CMATI

670 872 388

 
Condenan o Concello de Ourense a conceder ou indemnizar os días de libre disposición dos bombeiros/as PDF Imprimir Correo-e
Venres, 22 Xullo 2016 08:05

O Xulgado recoñécelles o dereito a gozar de seis días libres por asuntos propios ao ano

O Xulgado do contencioso administrativo número 1 de Ourense vén de condenar ao Concello de Ourense a conceder ou indemnizar os días de libre disposición dos bombeiros/as, que eran denegados pola Administración local alegando “necesidades do servizo”. A sentenza recoñécelles o dereito a gozar de seis días libres de permiso por asuntos propios ao ano.
12-10-19 bombeiros 002

Segundo explican dende o sector de Local da CIG-Administración, os bombeiros/as recorrentes alegaron na súa demanda que as resolucións impugnadas foron ditadas por un órgano incompetente, así como que a denegación dos permisos por “necesidades do servizo” carecía de xustificación, por canto o Concello utilizaba os días de libre disposición para cubrir a infradotación de persoal existente nos reténs de bombeiros/as.

Deste xeito, a sentenza anula as devanditas resolucións do Concello de Ourense por ter sido dictadas por un órgano incompetente e declara o dereito dos recorrentes a gozar de seis días de permiso por asuntos propios ao ano.

Ao mesmo tempo, condena a Administración local a concederlles, no prazo máximo de dous meses, os días de permiso por asuntos propios que lles foron denegados en 2015 por necesidades de servizo; ou subsidiariamente a indemnizalos/as pola súa perda coa cantidade equivalente á parte proporcional das retribucións correspondentes a un día laborábel por cada día de permiso perdido.

Diante disto, dende a CIG-Administración valoran positivamente unha sentenza que “reforza os dereitos dos traballadores/as nos Concellos desta provincia que, infelizmente, se ven anulados con decisións arbitrarias carentes de toda lexitimidade e baseadas no mero exercicio dun poder que non lles corresponde”.

 
A CIG-Administración reclama medidas excepcionais na loita contra os lumes coincidindo coas altas temperaturas PDF Imprimir Correo-e
Venres, 22 Xullo 2016 08:04
A central amosa a súa solidariedade cos feridos/as nos incendios de Ribas de Sil e Lobios
A CIG- Administración reclámalle á Xunta a adopción de medidas excepcionais de precaución na intervención dos incendios forestais coincidindo coas altas temperaturas, xa que nestas condicións a perigosidade no traballo aumenta exponencialmente, tal e como se puido comprobar nos recente lumes de Ribas de Sil e Lobios. Ao mesmo tempo, a central amosa a súa solidariedade cos brigadistas feridos/as nestes incendios e coas súas familias.
15-06-11 helicóptero lume

Dende a CIG-Administración expresan o seu apoio a todos os compañeiros/as e ás familias dos feridos/as nos lumes forestais de Ribas de Sil, en Lugo, e Lobios, en Ourense. “Queremos manifestar que o traballo da extinción de lumes forestais é moi perigoso e moitas veces os traballadores/as poñen en risco as vidas”, lembran.

Neste senso, sinalan que as condicións actuais de altísimas temperaturas e baixa humidade relativa, “os perigos no traballo multiplícanse exponencialmente, polo que a Xunta debera adoptar medidas excepcionais de precaución na intervención dos incendios”. Consideran que o adestramento e a formación son imprescindíbeis para minimizar os riscos, “e a Xunta do Partido Popular trata este traballo como outro calquera e non forma ao persoal de forma axeitada nin aplica protocolos normalizados”, como pode ser o protocolo OACEL (http://www.magrama.gob.es/es/desarrollo-rural/temas/politica-forestal/Protocolo_OACEL_tcm7-232583.pdf).

Dende a CIG esixen que en situacións tan adversas tanto de carga de combustíbel como de condicións climáticas sexan adoptadas medidas preventivas extraordinarias e que se proceda á formación do persoal de forma axeitada mediante protocolos claros e técnicas de autoprotección contra o lume.

 
Chamamento da CIG ante a celebración do Día da Patria Galega PDF Imprimir Correo-e
Mércores, 20 Xullo 2016 10:34

25 de xullo de 2016

A CIG chama ás traballadoras e aos traballadores galegos a participar nos actos que o nacionalismo galego celebre en Santiago de Compostela, e por Galiza adiante, o dia 25 de xullo, para conmemorar o Día da Patria Galega.
Bandeiras patria e CIG

A celebración do Día da Patria Galega supón para a clase traballadora galega unha data de reivindicación, conxuntamente co resto das clases populares galegas, do dereito que temos os galegos e galegas a decidir por nós mesmos o noso futuro como nación, a autogobernarnos e a poder vivir e traballar na nosa terra nunhas condicións dignas.

A celebración deste 25 de xullo coincide -ao amparo e coa xustificación de combater a crise económica- co afondamento no modelo de capitalismo neoliberal a través da imposición de todo un conxunto de políticas de recorte de dereitos, de salarios, do investimento e do gasto público e tamén das liberdades públicas; do incremento da precariedade laboral e do debilitamento da negociación colectiva; de redución de impostos ao capital mentres se incrementan á clase traballadora. En definitiva, de  debilitamento da clase traballadora no económico, no político e no organizativo.

Ao tempo que se empobrece á clase traballadora, as grandes corporacións económicas, o capital financeiro, seguen incrementando os seus beneficios e concentrando un maior poder económico e político. O capital controla e pon ao seu servizo aquelas institucións financeiras e políticas (Comisión Europea, Banco Central Europeo, Fondo Monetario Internacional, …), que funcionan á marxe da opinión e do control da cidadanía, e que  son as que ditan as políticas económicas, sociais e laborais a aplicar por parte dos gobernos e dos parlamentos, na grande maioría dos casos en mans das forzas políticas maioritarias da dereita (PP) e da socialdemocracia (PSOE) comprometidas co sistema neoliberal.

Altos niveis de desemprego, avellentamento e perda de poboación activa, emigración da xente moza, deterioro dos nosos sectores produtivos (leite, pesca, naval,…), apropiación do noso aforro e da enerxía que producimos, alleamento do noso sector financeiro, deterioro dos servizos públicos, perda de galego falantes, incremento da españolización da sociedade galega con menosprezo e infravaloración do propio, empezando polo noso idioma e seguindo polas nosas potencialidades económicas e humanas.

Todo isto enfróntanos a unha situación que levamos moito tempo a padecer e que dificulta o noso desenvolvemento pleno como pobo no económico, no social, no cultural, no idiomático e no político. A iso contribúe sen dúbida algunha, neste momento, a  incompetencia manifesta da Xunta de Galiza e do seu presidente o sr. Feijoo, incapaces de ofrecer alternativas e saídas pensadas nos intereses das clases populares galegas, pero tamén inflúe de forma determinante a falta de soberanía política de Galiza e o papel que tradicionalmente xogamos, no contexto do Estado e da Unión Europea, de nación colonizada espoliada, subministradora de man de obra, materias primas e aforro.

Neste contexto, cobra aínda máis forza a necesidade de termos soberanía política para poder estabelecer os mecanismos adecuados para unha mellor defensa dos nosos sectores produtivos básicos, para modernizar as nosas infraestruturas e os servizos sociais, para levar adiante unha política de emprego propia, para potenciar unha economía autocentrada ao servizo e en beneficio da maioría social. A dependencia favorece as desigualdades sociais, discrimina a nosa cultura e lingua, debilita o noso proxecto colectivo, hipoteca o noso futuro individual e social.

Por todas estas razóns as traballadoras e os traballadores galegos somos os primeiros interesados en participar activamente nos actos conmemorativos e reivindicativos do Día da Patria Galega, pondo o noso esforzo ao servizo da conquista dunha sociedade galega máis xusta, máis igualitaria, máis solidaria e máis soberana.

 
A CIG demanda a cinco Concellos ourensáns por violación do dereito á igualdade no proceso de selección de persoal PDF Imprimir Correo-e
Mércores, 20 Xullo 2016 10:33
Acusa os Gobernos locais de Laza, Oímbra, Monterrei, Cualedro e Vilardevós de “deseñar unha carreira de obstáculos para favorecer a un grupo reducido de escollidos/as”
A Unión Local da CIG de Verín e A Limia vén de interpor sete recursos contencioso administrativos contra os Concellos de Laza, Oímbra, Monterrei, Cualedro e Vilardevós por violación do dereito á igualdade dos cidadáns/ás durante a selección de persoal temporal. Dende a central acusan os Gobernos locais de “deseñar unha carreira de obstáculos para favorecer a un grupo reducido de escollidos/as”.
logo cig

O inicio das demandas remóntase ao pasado 9 de xullo, cando se publicaron no BOP de Ourense e na páxina web da Deputación Provincial sete resolucións das Alcaldías de Laza (3), Oímbra (1), Monterrei (1), Cualedro (1) e Vilardevós polas que se aprobaron as bases para contratar persoal temporal. En concreto tratábase fundamentalmente da contratación de traballadores/as das brigadas de incendios, mais tamén de monitores/as, albaneis e outras profesións.

Por medio destes anuncios tamén se convocaron os procesos selectivos correspondentes, “conferindo aos interesados/as o exiguo prazo de tres días hábiles para presentar as súas solicitudes, advertindo, na maioría dos casos, que as bases reguladoras das convocatorias estarían publicadas nas webs dos Concellos ofertantes ou nos taboleiros de anuncios”. O que significa, tal e como denuncia a CIG, que se fixo sen publicarse, como impón a lei, en Diarios Oficiais.

Na central consideran que os Concellos demandados “deseñaron unha carreira de obstáculos coa finalidade de agochar aos cidadáns/ás en xeral as convocatorias, reducir ao máximo a súa difusión pública, dificultar a obtención das bases reguladoras e, en definitiva, quebrar o principio de igualdade, co obxecto de reservar os postos de traballo públicos pra un grupo reducido de escollidos/as”.

Neste senso, lembran que os textos das bases reguladoras das convocatorias, malia que deberon ser inseridos en boletíns oficiais como establece a lei, non se publicaron máis que nos taboleiros de anuncios dos Concellos, webs municipais ou da Deputación provincial. “Aínda por riba, tendo sido publicados os anuncios o 9 de xullo varias webs non fixeron públicas as bases de contratación até o día 11, e iso con só tres días de prazo para a presentación de solicitudes”.

Na maioría das bases reguladoras publicadas outórgaselle 0,25 puntos por mes e un máximo de catro puntos a quen acredite a prestación de servizos previa para o propio Concello ofertante; fronte aos 0,10 puntos por mes e un máximo dun punto a quen acredite a prestación de servizos nalgunha das demais Administración públicas, “tornando tal criterio discriminatorio por razón de residencia e emprego”.

Ademais, prevese a realización da denominada entrevista persoal, consistente na avaliación duns supostos méritos específicos (indemostrábeis obxectivamente). “En realidade, esta entrevista persoal, baixo a aparencia dunha segunda avaliación de méritos, non é mais que o típico apaño para facer o encaixe pretendido e adxudicar o posto a quen se prefire”, critican.

 
A CIG logra que o Xulgado de Ourense aplique o convenio do persoal laboral da Xunta a empregados/as de Seaga PDF Imprimir Correo-e
Xoves, 14 Xullo 2016 11:27
A medida beneficia a 71 brigadistas, mais a central intentará que se estenda aos 500 operarios/as
O Xulgado do Social número 3 de Ourense vén de decretar, resolvendo dúas das catro demandas interpostas pola Unión Local da CIG de Verín e A Limia en representación de 71 traballadores/as de Seaga, que os dereitos e deberes do persoal, ao carecer de convenio colectivo propio, deben de estar regulados polo convenio do persoal laboral da Xunta. A central xa anunciou que iniciará unha campaña para estender o efecto destas sentenzas, que aínda poden ser recorridas diante do TSXG, aos 500 empregados/as da compañía pública.
2016 07 12 RoldaPrensaCeagaConvenioPersoalLaboralXunta

A decisión xudicial que se vén de coñecer, e que hoxe foi presentada en rolda de prensa, respalda as teses defendidas pola CIG, que basea a súa argumentación nos artigos 45 e 46.6 da Lei 16/2010 do Sector Público Autonómico, “que non son respectados nin pola dirección de Seaga nin pola Consellaría do Medio Rural”.

Dende a central lembran que o primeiro destes artigos establece que as sociedades mercantís públicas autonómicas, como Seaga, forman parte das denominadas entidades públicas instrumentais da Xunta, mentres o artigo 46.6 determina que os instrumentos que regulen as condicións de traballo e réxime retributivo do persoal deste tipo de sociedades deben de contemplar <<un réxime retributivo semellante ao do resto do persoal laboral da Xunta>>.

Na CIG entenden que o persoal da Seaga deu un paso moi importante tanto na normalización imediata dos seus dereitos e obrigas (retribucións, descansos, vacacións, antigüidades, etc.) como na futura negociación colectiva “que supoñemos que agora si a dirección da empresa estará interesada en emprender, baixo risco de aplicación do convenio do persoal laboral da Xunta de non facelo”.

Así, trasládanlle os seus parabéns xa que, aínda que a aplicación destas resolucións se poida demorar no caso de que sexan recorridas ao TSXG, “constitúen un fito chave dirixido a rescatar da precariedade un servizo público esencial para o rural galego e para os nosos montes”.

Ao mesmo tempo, anuncian que iniciarán nos próximos meses unha campaña para estender o efecto destas sentenzas a todo o persoal da Seaga na Galiza (500 operarios/as), así como para reclamar a aplicación do resto dos dereitos contidos no convenio da Xunta ao persoal da empresa pública, “non só as horas extras e nocturnas que foron o motivo inicial polo que se interpuxeron as demandas”.

A decisión xudicial chega pouco despois de que a Sala do Social do TSXG condenase a Seaga a estender o período de contratación de todos os traballadores/as fixos/as descontinuos/as á duración completa das campañas de perigo alto, o que implicará un aumento de 35 días a cada empregado/a. A sentenza, que afectará a uns 500 brigadistas de extinción de incendios forestais de todo o país, chegou a raíz da demanda de conflito colectivo presentada pola CIG.

 
ucias de persoas mobilízanse en defensa do CGAI, os empregos e o sector audiovisual galego PDF Imprimir Correo-e
Xoves, 14 Xullo 2016 11:27
As amortizacións e despedimentos aplicados pola Xunta comprometen o futuro dun centro con 25 anos de historia
Ducias de persoas concentrábanse na tarde do mércores en rexeitamento ao desmantelamento do CGAI e contra as amortizacións e despedimentos aplicados pola Xunta do PP. Un novo recorte nos servizos públicos que compromete o futuro do único organismo galego adscrito á Federación Internacional de Arquivos Fílmicos e asesta un golpe á memoria histórica da Galiza e á subsistencia do sector audiovisual galego.
16-07-13 Concentracion CGAI09

Durante a protesta, convocada por colectivos do sector audiovisual e apoiada pola CIG, Antón Ramos, un dos proxeccionista do CGAI que foi despedido a través da modificación da RPT, advertía que o centro queda nunha situación moi complexa, con tres postos menos e un único proxeccionista.

Isto suporá que “se o proxeccionista se pon enfermo haberá que suspender as funcións”. Ademais, alertou, a falta de profesionais técnicos pon en cuestión a continuidade do programa de cursos e colaboracións que o CGAI realiza con diferentes centros educativos e polo que anualmente pasan uns 2.500 escolares. É dicir, con este recorte de persoal resulta inviábel o desenvolvemento dunha programación regular e de todos os ciclos formativos que se veñen realizando.

Neste senso, Ramos apuntaba que aínda que se produza unha reorganización interna do persoal, “quen non teña os coñecementos adecuados non pode operar nunha cabina cinematográfica e o arquivo vai quedar manco, sen ninguén que o poida traballar”.

“Quedamos sen un organismo de referencia e corremos o perigo de que toda a memoria audiovisual galega se poña en risco, E todo por aforrar tres postos de traballo, mentres continúan a aumentar os postos directivos”, lamentou.

Ramos criticou as “falacias” da Xunta do PP e do propio Secretario de Cultura, cando antes das eleccións negaban que se foran a producir recortes no CGAI. Porén, unha vez superado o proceso electoral “faltoulles tempo para cambiar de opinión e, sen negociación, asinar os despedimentos e as amortizacións”.

Na protesta, pediuse tamén a dimisión do director do CGAI por non saír na defensa dos seus traballadores/as, non condenar os recortes no centro que dirixe e permitir o abandono do arquivo audiovisual de Galiza.

Finalmente, Ramos advertiu que a loita na defensa do CGAI continuará, reclamando do goberno de Feijoo responsabilidade na protección “da cultura galega, do patrimonio audiovisual galego e da nosa memoria”.

 
A CIG apoia e chama a participar na concentración convocada contra o desmantelamento do CGAI PDF Imprimir Correo-e
Martes, 12 Xullo 2016 11:38
O mércores 13 de xullo, ás 20 horas, diante do edificio do centro de artes da imaxe
A CIG amosa o seu apoio e chama a secundar a concentración convocada polos distintos colectivos audiovisuais galegos para este mércores, 13 de xullo, ás 20 horas, en contra do desmantelamento do Centro Galego de Artes da Imaxe (CGAI). A protesta terá lugar diante do propio edificio do CGAI, na Rúa Durán Loriga, 10.
FronteCGAI

A central sindical rexeita a proposta de RTP formulada pola Xunta de Galiza, que implica a desaparición de 3 postos de traballo e o despedimento do traballador que ocupaba o posto de proxeccionista, ao tempo que esixe o mantemento deste servizo público e a dotación do persoal necesario. E así o trasladou a CIG nas diferentes mesas de negociación e comisións de persoal nas que se tratou este novo recorte dos servizos públicos.

Para a Federación de Administración da CIG da Coruña estamos ante un novo paso nas políticas do Goberno de Feijoo para “rematar a toda costa co público e vendelo envolvido en papel de celofán á empresa privada, levando polo camiño os postos de traballo e mailo sector produtivo do audiovisual galego”.

A este respecto lembran que o CGAI é o único organismo galego adscrito á Federación Internacional de Arquivos Fílmicos e, logo de 25 anos de vida, converteuse nun centro de referencia no ámbito do Estado. A súa desaparición ou confinamento a un mero organismo decorativo, que semella ser o obxectivo da Xunta con esta eliminación de postos de traballo, constitúe unha grave ameaza para a memoria histórica da Galiza e para a subsistencia do sector audiovisual galego.

Así mesmo dende a CIG-Administración denuncian que, “agochado neste desmantelamento e na destrución de emprego público, coexiste a creación de prazas de asesores vía "libre designación" nese empeño de creación de administracións paralelas”.

 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 8 de 48
Joomla Templates: by JoomlaShack