Federación de Administración Pública da CIG

Federación de Administración Pública da CIG

Ligazóns sectores

Autonómica
Correos
Xustiza

Ligazons confederacion

CIG - Avantar
Forga
Saúde laboral
Fesga

Procurar no web

Novas
A CIG non asinará ningún acordo con Facenda que non contemple a recuperación de dereitos laborais e sociais PDF Imprimir Correo-e
Mércores, 11 Outubro 2017 10:29

O conselleiro anunciou na mañá deste martes que a Xunta non negociará esa recuperación

O conselleiro de Economía, Valeriano Martínez, convocou esta mañá á Área Pública da CIG a unha xuntanza para presentar as propostas da Xunta de Galiza relativas ao Plan de Estabilización de Emprego nas administracións públicas galegas; a Lei de Orzamentos 2018 e a Lei de Medidas Temporais. Propostas que a CIG rexeitou anunciando ademais que non asinará acordos que non garantan recuperación de dereitos do persoal das administracións públicas galegas.

No relativo ao Plan de Estabilización o conselleiro anunciou que a Xunta ten a intención de aprobar un acordo marco que atinxa os anos 2018, 2019 e 2020 no que se contempla consolidar emprego e trasladar a Galiza o acordo que se asine en Madrid este ano máis o asinado cos sindicatos españois xa en marzo de 2017.

A este respecto, a Área Pública da CIG manifesta que “é lamentábel que a Xunta de Galiza traslade mimeticamente un acordo acadado en Madrid, sen facer sequera o esforzo de adaptalo ás especificidades da administración pública galega, nin ter en conta a situación na que se atopa o seu persoal”.

María Carme López Santamariña, portavoz da CIG-Área Pública denuncia ademais que “ese acordo vai consolidar os recortes de persoal que se fixeron ao longo de todos estes anos”. A isto engade que “lonxe de como o intentan vender publicamente non suporá un aumento de emprego público xa que o que vai facer é darlle saída a unha situación insostíbel de temporalidade que hai hoxe na administración pública galega para lavar a súa imaxe”.

Con todo, o texto non foi entregado na xuntanza e, segundo informou o conselleiro, será remitido no decurso deste martes día 10. A Área Pública da CIG, unha vez o avalíe pormenorizadamente dará conta da súa posición definitiva respecto do mesmo.

Lei de Orzamentos 2018

No relativo a incrementos salariais, que teñen que ser recollidos na Lei de Orzamentos, López Santamariña explica que o propio conselleiro sinalou que a situación, por mor da paralización dos Orzamentos Xerais do Estado, “non lles permite avanzar nesta cuestión o que implica que as traballadoras e traballadores da administración verán máis unha vez os seus salarios conxelados até que desde Madrid lles diten o que teñen que facer”.

Isto denota para a portavoz da Área Pública “a grave incapacidade da Xunta de Galiza para tomar as súas propias decisións cando ten competencias para  facelo”. Lembra ademais que porén “cando decidiu recortarnos, entre outras cousas, o 40% das pagas extra desde o ano 2013 ao 2016 aí non solicitou permiso algún a Madrid para executar ese roubo”.

López Santamariña denuncia ademais que o propio conselleiro xa anunciou que non tiña intención algunha de abordar calquera caste de recuperación de dereitos laborais, salariais ou sociais do persoal das administracións públicas galegas.

Lei de Medidas

En canto á Lei de Medidas Temporais, o conselleiro anunciou modificacións no referido a permisos de maternidade/paternidade na liña do xa anunciado por Feixóo no debate do Estado da Nación. A CIG xa adiantou sobre esta cuestión que “a postura acordada pola central sindical é de loitar por conseguir permisos de maternidade de, como mínimo, un ano e igualar estes co de paternidade”.

Plans de Igualdade nas Administracións Públicas Galegas

Ademais a CIG puxo sobre a mesa tanto a situación na que se atopan os xulgados de violencia de xénero como a demanda de aplicación real e efectiva da lexislación actual en materia de igualdade, para garantir a igualdade real entre homes e mulleres na administración pública galega a través da negociación de Plans de Igualdade de Oportunidades.

Unha demanda que xa lle fixo chegar a central sindical ao propio Presidente da Xunta no mes de xullo e que recibiu como resposta literal que con data de 21 de agosto “deuse traslado deste á Vicepresidencia e Consellaría de Presidencia, Administracións Públicas e Xustiza, para o seu coñecemento e efectos que procedan”.

Traslado do que non tiña constancia o conselleiro tras ser preguntado por esta cuestión para saber se se procedería a adoptar algunha medida. En todo caso “á marxe de recoñecer as eivas da administración pública galega respecto desta materia o conselleiro non se comprometeu a solucionar nin esta cuestión nin a situación dos xulgados de violencia de xénero”, conclúe López Santamariña.

 
A CIG non asinará acordos que non garantan a recuperación de dereitos laborais do persoal público PDF Imprimir Correo-e
Martes, 26 Setembro 2017 09:00

A Mesa de Negociación das Administracións Públicas foi adiada até a próxima semana

A Mesa Xeral de Negociación das Administracións Públicas, convocada este xoves para aprobar as cuestións relativas a condicións laborais e salariais dos empregados/as públicos/as -para a súa inclusión nos Orzamentos Xerais do Estado de 2018-, quedou adiada para a semana que vén malia o Goberno do PP ter avanzados acordos con CCOO, UGT e CSIF á marxe do organismo. Dende a CIG xa adiantaron que non asinarán ningunha proposta que non contemple a recuperación dos dereitos que lle foron arrebatados ao funcionariado dende 2010.

Na Mesa, as organizacións sindicais recibiron como xustificación deste atraso que cunha semana máis se pode seguir mellorando o acordo. Ademais entregouse un novo documento e convidouse aos sindicatos con representación na mesma a estudalo e presentar propostas.

Ao comezo da xuntanza a representante da Área Pública da CIG, Maricarme López Santamariña trasladou á Secretaria de Estado a denuncia polas negociacións que se veñen desenvolvendo con CCOO, UGT e CSIF á marxe da Mesa Xeral, excluíndo a outras organizacións sindicais que, como a CIG, contan con representación na mesma. Negociacións que a Secretaria de Estado tratou de xustificar argüíndo que se desenvolveron no marco dunha comisión creada coas organizacións asinantes do anterior acordo.

López Santamariña apuntou ademais que ao incio da xuntanza o representante do CSIF “tivo unha intervención esperpéntica trasladando a Mesa e o Ministerio a súa solidariedade cos funcionarios/as cataláns que están pola defensa da unidade de España e do ordenamento xurídico español”.

A portavoz da Área Pública explica que o acordo contempla cuestións relativas a condicións laborais, pero deixa á marxe o referido a retribucións. “Entendemos que forma parte desa escenificación, porque van apoiar o documento do goberno pero amosar oposición no que respecta ás retribucións, para que esa posición lles sirva como lavado de cara”.

Con todo, a Área Pública da CIG xa manifestou a súa decisión de non apoiar ningún acordo que non contemple a derrogación dos Decretos-Lei impostos ao persoal das Administracións públicas desde o ano 2010, entre outros: RD-Lei 8/2010, polo que se adoptan medidas extraordinarias para a redución do déficit público; RD-Lei 20/2011, de medidas urxentes en materia orzamentaria e tributaria para a corrección do déficit público; e RD-Lei 20/2012, de medidas para garantir a estabilidade orzamentaria e de fomento da competitividade.

Isto xunto con todos aqueles decretos impostos polo Goberno español relativos a reformas laborais, reforma da negociación colectiva, modificacións das pensións e demais recortes das condicións laborais e salariais que afectan ao conxunto da clase traballadora.

A Área Pública da CIG exixe tamén a restitución de todos os dereitos laborais e salariais (horarios, pagas extras, salarios, 100% do salario en situación de IT, fondo social, etc) que lle foron arrebatados ao persoal empregado público desde o ano 2010.

Taxa de reposición

A proposta que se baralla contempla manter taxas de reposición , o que para a CIG “sentenza aos sectores produtivos a seguir perdendo persoal” . De feito limítase ao 100% para sectores prioritarios tal e como se aprobou no 2017 e pasa do 50 ao 75% nos sectores considerados non prioritarios, Iso si, nos ámbitos de seguridade cidadá (policía nacional, local…. ) será do 115%.

A intención do goberno é que cada administración poida dispoñer dun 5% adicional  a engadir ás taxas xénericas que se aproben, para calquera dos  sectores que cada administración estime conveniente. Con todo “néganse a aprobar a nosa demanda de restitución da capacidade de decisión das comunidades autónomas sobre a xestión do seu cadro de persoal. Lonxe disto, centralízase aínda máis”.

Establécese, xunto a isto, unha taxa de reposición especial – sen definir- para a dotación de interventores na administración local.

Estabilización do persoal

A proposta da administración fala dunha taxa de reposición adicional, que non se podería considerar como tal  e que sería  xeral para todos os ámbitos, que non computará  na taxa xenérica de reposición. “Sería algo así como ampliar algo o texto e liña de actuación  do último acordo que asinaron coas centrais sindicais sobre a estabilización do persoal das administracións públicas”.

A CIG-Área Pública chama a atención sobre esta cuestión porque se están vendendo estes procesos de estabilización de emprego, como un aumento de emprego público. “Non é verdade porque o único que se pretende con isto é cumprir as sentenzas europeas referidas á precariedade que padece o persoal das administracións públicas. Unha situación a que están máis dun 40% dos traballadores/as que teñen un contrato eventual, interino ou por horas ou días”, denuncia López Santamariña.

Retribucións

A proposta de incremento salarial, que non vai incluída no acordo cos sindicatos CCOO, UGT e CSIF contempla un incremento fixo para tres anualidades do 1,5% para 2018; do 1,75% para 2019 e do 2% para 2020, xunto cunha parte variábel que estaría condicionada ao PIB de cada ano que consistiría nun 0,25% e un 0,50% adicionais se se cumpren as previsións.

Para a Área Pública esta medida é inaceptable nun contexto de incremento de prezos e produto interior bruto por enriba do 3%. “Non se propoñen medidas de ningún tipo para recuperar o poder adquisitivo perdido durante estes anos, que en conxunto  se poden cifrar nun 27% para o persoal que traballa para a Administración do Estado e nun 38,7% para o persoal que traballa no ámbito da administración da Xunta de Galiza”, sinala a portavoz da CIG que advirte ademais que “as diferenzas salariais e de condicións económicas entre o persoal das distintas administracións continuará sen converxer, sendo discriminatoria a carga da  perda adquisitiva que sufrimos os traballadores das administracións polo só feito de traballar para unha administración ou para outra”.

A representante da CIG é contundente sinalando que “nos parece unha tomadura de pelo que aos traballadores e traballadoras das administracións públicas se nos fale de recuperación económica, tendo en conta todo o que perdemos nestes anos”.

INDICE DE EVOLUCIÓN DO IPC E SUBA SALARIAL NOS ÚLTIMOS 7 ANOS (1-1-09 a 31-12-16)

ANO      IPC GALIZA         IPC ESTADO       SUBA SALARIAL               DIF GZ                  DIF ESTADO

2009      0,8%                      0,9%                     2%                                      1                       1,1%

2010      3%                      3,1%                       -5%                                    -8%                     -8,1%

2011      2,4%                  2,5%                         0%                                   -2,4%                   -2,5%

2012      2,9%                   2,6%                       -7%                                 -9,9%                   -9,6%

2013      0,3%                   0,5%                       -4% (Autonómica           -4,3%                     -0,5%

2014      -1%                    -1%                        0%                                      1%                         1%

2015      0,%                    -0,2%                     0%                                      0,0%                    0,2%

2016      1,6%                 1,6%                       1%                                    -0,6%                      -0,6%

TOTAL   10                       10                        -13                                      -23                          -19

IFonte: INE e Orzamentos Xerais do Estado e da Xunta de Galiza dos anos correspondentes.

 
O Concello de Guitiriz non paga os trienios nin o plus de transporte ao persoal de axuda a domicilio PDF Imprimir Correo-e
Martes, 26 Setembro 2017 08:55

Dende a CIG de Lugo-A Mariña demandan unha solución inmediata

O Concello de Guitiriz está a incumprir o pago dos trienios e da quilometraxe a quen ten dereito o persoal de axuda a domicilio. A CIG de Lugo-A Mariña denuncia que esta situación se vén producindo dende hai máis de tres anos, polo que lle reclama ao goberno local que poña solución de inmediato a esta discriminación.

O Concello non abona as cantidades correspondentes polos trienios ao persoal que presta o servizo de axuda a domicilio, a pesar de que a alcaldesa se comprometeu a regularizar esta situación. "Mais pasan os meses e o persoal continúe sen cobrar. Isto é unha actitude e unha conduta absolutamente irresponsábel e neglixente", critica Lois Neto, secretario de organización da CIG de Lugo.

Neste senso, engade que, en vez de resolver os problemas dos traballadores e traballadoras municipais, a alcaldesa "dedícase a ameazar ao persoal do concello coa privatización dos servizos cando lle demandan un dereito laboral, nunha actitude absolutamente mafiosa. Este continuo e permanente incumprimento cara ás traballadoras deste servizo amosa unha actitude absolutamente de insensibilidade e desprezo por parte da alcaldesa", lamenta.

Ademais, a Unión Comarcal da CIG denuncia que as traballadoras de axuda a domicilio tampouco cobran ningún plus de transporte, véndose obrigadas a pagar o combustíbel e pór elas mesmas o coche para os desprazamentos.

"Desde a CIG esiximos a alcaldesa  que solucione en breve prazo de tempo estas cuestións  ou verémonos na obriga de iniciar todas as acción posíbeis tanto no plano xurídico, onde xa existen demandas interpostas no Xulgado do Social, coma no plano social para que os dereitos destes grupos de traballadores e traballadoras sexan respectados".

 
O comité do Porto de Vigo alerta sobre os problemas na Policía Portuaria derivados da falta de axentes PDF Imprimir Correo-e
Martes, 26 Setembro 2017 08:54

Denuncia que se pon en perigo a traballadores/as, usuarios/as e visitantes das instalacións

O comité de empresa da Autoridade Portuaria de Vigo (APV), presidido pola CIG, vén de alertar publicamente sobre os graves problemas que se rexistran na Policía Portuaria como consecuencia da falta de axentes. Dende a representación do cadro de persoal denuncian que nos últimos tempos prestouse servizo en eventos potencialmente perigosos con até catro policías menos do normal, o que supón un risco para traballadores/as, usuarios/as e visitantes das instalacións portuarias.

O presidente do comité e voceiro da CIG na APV, Diego González, explica que nos últimos meses esta situación volveuse crítica, chegando a prestar servizo con ata catro axentes por debaixo do que debería ser normal no transcurso de eventos potencialmente perigosos debido á masificación de xente e á venda de bebidas alcólicas. “Sen esquecer o sucedido na última edición do Marisquiño, na que os policías se viron obrigados/as a facer algún parte de servizo indicando a pouca presencia da Policía Portuaria no peirao”.

Critica que a situación se volvese a repetir durante varias fins de semana, “mais o vaso colmouse neste mesmo mes de setembro ao coincidir a Oktober Fest na Estación Marítima, o festival Vigo Street Stunt na zona do Náutico e Comercio e a feira VigoMar ou Festa do Marisco no Berbés”. Nestas datas o reforzo foi inexistente, chegando a estar menos axentes de servizo que nun día normal.

En datas sinaladas o reforzo foi inexistente, chegando a estar menos axentes que un día normal

Deste xeito, considera que a APV está a por en perigo tanto aos seus traballadores/as como aos usuarios/as do Porto e visitantes aos diversos eventos e ás instalación portuarias e censura “o servilismo de moitos mandos intermedios que permiten que se poña en perigo aos axentes, que sempre son os primeiros en chegar a calquer incidente que se produce dentro da zona portuaria”.

Na opinión do comité, a Policía Portuaria está a sufrir nas súas carnes o abandono no que o presidente da APV, Enrique López Veiga, ten o Porto de Vigo. “Neste último mes os servizos que se están a prestar están baixo mínimos alarmantes debido a una decisión do súa de non permitir que os axentes realicen xornadas dispoñíbeis, que son aquelas que os policías portuarios realizan cando se precisa un reforzo especial ou se produce un imprevisto e son chamados/as para traballar en día de descanso a cambio de 70 euros e outra xornada libre compensatoria”.

Advertencia de Portos do Estado

Sinalan que o propio López Veiga lle comentou ao comité de empresa que adoptou a medida debido a unha advertencia de Portos do Estado na que o ameazaban con diminuír a masa salarial do presidente e da directora da APV se se excedían da masa asignada para produtividade, que é a masa na que repercuten as xornadas dispoñíbeis. “Esa advertencia é produto dun exceso de 76.000 euros sobre a produtividade no exercicio do ano 2016, pero ese exceso foi producido na meirande parte por culpa da política de recortes que López Veiga ven aplicando dende a súa entrada no Porto de Vigo en 2015, e que incluíu unha redución do 10 % do cadro de persoal”.

Neste senso, indican que aínda que ese exceso de 76.000 euros é real, López Veiga e Beatriz Colunga, a directora da APV, “non contan toda a verdade e manexan as cifras como lles vén en gaña, e non contan que no que se refire á masa salarial xeral da APV a diferencia é de 400.000 euros por debaixo da asignada (debido tamén a esa política rácana e austera, sempre en contra do traballador/a)”.

Diante disto, sosteñen que se con estes datos o presidente da APV non é quen de rebatirlle a advertencia a Portos do Estado “non nos estraña que o Porto de Vigo se estea a afundir de maneira alarmante e se sigan a perder tráficos e que as grandes navieras marchen para os portos veciños”. Finalmente, amosan o seu convencemento de que López Veiga seguirá a buscar culpábeis desta situación fóra do organismo que preside “pois a autocrítica parece que non vai con el”.

 
A CIG non asinará acordos que non garantan a recuperación de dereitos laborais do persoal púiblico PDF Imprimir Correo-e
Venres, 22 Setembro 2017 09:10

O Goberno español adiou a Mesa de Negociación das Administracións Públicas até a próxima semana

A Mesa Xeral de Negociación das Administracións Públicas, convocada este xoves para aprobar as cuestións relativas a condicións laborais e salariais dos empregados/as públicos/as -para a súa inclusión nos Orzamentos Xerais do Estado de 2018-, quedou adiada para a semana que vén malia o Goberno do PP ter avanzados acordos con CCOO, UGT e CSIF á marxe do organismo. Dende a CIG xa adiantaron que non asinarán ningunha proposta que non contemple a recuperación dos dereitos que lle foron arrebatados ao funcionariado dende 2010.

Na Mesa, as organizacións sindicais recibiron como xustificación deste atraso que cunha semana máis se pode seguir mellorando o acordo. Ademais entregouse un novo documento e convidouse aos sindicatos con representación na mesma a estudalo e presentar propostas.

Con todo, a Área Pública da CIG xa manifestou a súa decisión de non apoiar ningún acordo que non contemple a derrogación dos Decretos-Lei impostos ao persoal das Administracións públicas desde o ano 2010, entre outros: RD-Lei 8/2010, polo que se adoptan medidas extraordinarias para a redución do déficit público; RD-Lei 20/2011, de medidas urxentes en materia orzamentaria e tributaria para a corrección do déficit público; e RD-Lei 20/2012, de medidas para garantir a estabilidade orzamentaria e de fomento da competitividade.

Isto xunto con todos aqueles impostos polo Goberno español relativos a reformas laborais, reforma da negociación colectiva, modificacións das pensións e demais recortes das condicións laborais e salariais que afectan ao conxunto da clase traballadora.

A Área Pública da CIG exixe tamén a restitución de todos os dereitos laborais e salariais (horarios, pagas extras, salarios, 100% do salario en situación de IT, fondo social, etc) que lle foron arrebatados ao persoal empregado público desde o ano 2010.

 
CIG-Área Pública rexeita a proposta de vincular o medre salarial do funcionariado ao PIB PDF Imprimir Correo-e
Mércores, 13 Setembro 2017 10:49

Denuncia que CCOO, UGT e CSIF negocian á marxe da Mesa Xeral de Administracións Públicas

A CIG-Área Pública (CIG-Administración, CIG-Ensino e CIG-Saúde) denuncia as negociacións que están desenvolvendo os sindicatos estatais CCOO, UGT e CSIF -a marxe da Mesa Xeral de Administracións Públicas- co Ministerio de Facenda e rexeita a proposta que se vén de facer pública de vincular os incrementos salariais ao PIB.

A CIG-Área Pública denuncia, máis unha vez, a actitude das organizacións sindicais estatais CCOO, UGT e CSIF “por prestarse a negociar a marxe da Mesa Xeral de Negociación das Administracións Públicas excluíndo e suplantando de xeito indigno a organizacións sindicais, como a CIG, que contan con representación tanto nesa mesa como nas distintas mesas sectoriais”.

Neste sentido, a portavoz da Área Pública, María Carme López Santamariña, denuncia que é “escandaloso” tanto o seu “colaboracionismo co goberno do PP, como que acepten unha fórmula de negociación que favorece a pretensión  que este ten de baleirar de contido unhas mesas que foron concibidas para que no seu seo se negocien todas as cuestións relativas a condicións laborais, salariais e sociais das empregadas e empregados do sector público e non como simples expositores dos acordos aos que entre eles chegaran previamente”.

De feito, a portavoz da Área Pública considera que CCOO, UGT e CSIF actúan deste xeito coa pretensión de acaparar a representatividade porque saben que en Galiza perden cada día máis terreo fronte organizacións sindicais como a CIG. Así lembra que en Sanidade a CIG conta con 57 delegados/as e que por detrás a que máis se lle aproxima desas tres é CCOO con 20 delegados/as menos; que a CIG é a central sindical maioritaria no ensino público non universitario, onde ten o 46% de representación, case a maioría absoluta, e que na administración a CIG, cunha representatividade do 54,05%, supera a todos os demais sindicatos xuntos.

Esta condición de forza sindical maioritaria no ámbito da función pública que a CIG ten no noso país “nunca foi empregada do mesmo xeito que estas organizacións fan a nivel do Estado, respectando en todo momento o papel e a representatividade de cadaquén no único foro válido, o das mesas de negociación”, subliña.

Recuperación salarial

A Área Pública da CIG denuncia ademais a “falta de comunicación, transparencia e información” respecto das negociacións que se están desenvolvendo, relativas tanto a incrementos salariais como a condicións laborais e sociais e rexeita que se vinculen ao PIB os incrementos salariais futuros. Entende que iso non permitirá recuperar os dereitos laborais suprimidos nin as condicións salariais recortadas. Recortes iniciados polo goberno de Zapatero en 2010, cunha rebaixa do 5% da masa salarial, e que seguiron tanto co goberno de Mariano Rajoy como co de Feijoo, co agravante de que os recortes aplicados pola Xunta de Galiza foron superiores aos do resto do Estado.

A CIG reclama ademais que en calquera negociación que se aborde respecto da situación laboral e salarial do funcionariado se teñan en conta cuestións como a recuperación dos fondos de acción social, a volta á xornada laboral anterior ou a recuperación do complemento do 100% nos casos de IT, entre outros.

 
A CIG chama a clase traballadora a participar nos actos do Día da Patria PDF Imprimir Correo-e
Xoves, 20 Xullo 2017 08:47

A central lembra que é unha data festiva mais tamén de reivindicación do noso dereito a decidir

Con motivo da celebración o vindeiro día 25 de xullo do Día da Patria Galega, a CIG chama a clase traballadora a participar nos actos que o nacionalismo galego celebre en Galiza e, nomeadamente, en Santiago de Compostela. Unha data de celebración, mais tamén de reivindicación do dereito que temos as galegas/os a decidir por nós mesmas/os o noso futuro como nación, a autogobernarnos e a poder vivir e traballar na nosa terra nunhas condicións dignas.

A celebración deste 25 de xullo coincide cun momento de revitalización da mobilización social que demostra que a loita contra os recortes impostos e contra as medidas que viñeron afondar no capitalismo neoliberal dan os seus froitos. Así o constatan as últimas folgas protagonizadas pola CIG no centro de atención a emerxencias 112 ou no transporte de viaxeiros/as por estrada. Mais tamén aquelas que se manteñen con coherencia e firmeza, como en Ferroatlántica, contra un modelo económico colonial que espolia os nosos recursos naturais; no sector do metal da provincia da Coruña por un convenio digno que permita mellorar as condicións laborais e salariais e eliminar a precariedade ou en obras públicas como a da ponte de Rande, onde se impoñen abusivas condicións laborais con graves consecuencias para a vida dos traballadores/as.

Loitas, todas elas, consecuencia de todo un conxunto de políticas de recorte de dereitos, salarios, investimento e gasto público e tamén das liberdades públicas; do incremento da precariedade laboral e do debilitamento da negociación colectiva; de redución de impostos ao capital mentres se lle incrementan á clase traballadora. En definitiva, políticas que pretenden debilitar a clase traballadora no económico, no político e no organizativo.

Ao tempo que se empobrece a clase traballadora, as grandes corporacións económicas, o capital financeiro, seguen a incrementar os seus beneficios e a concentrar un maior poder económico e político. O capital controla e pon ao seu servizo aquelas institucións financeiras e políticas (Comisión Europea, Banco Central Europeo, Fondo Monetario Internacional, etc.), que funcionan á marxe da opinión e do control da cidadanía, e que son as que ditan as políticas económicas, sociais e laborais a aplicar por parte dos gobernos e dos parlamentos, na grande maioría dos casos en mans das forzas políticas maioritarias da dereita (PP) e da socialdemocracia (PSOE) comprometidas co sistema neoliberal.

Necesidade de soberanía política

Altos niveis de desemprego, avellentamento e perda de poboación activa, emigración da xente moza; deterioro dos nosos sectores produtivos (leite, pesca, naval...); apropiación do noso aforro e da enerxía que producimos; alleamento do noso sector financeiro; deterioro dos servizos públicos; perda de galegofalante; afondamento na españolización da sociedade galega con menosprezo e infravaloración do propio, comezando polo noso idioma e seguindo polas nosas potencialidades económicas e humanas.

Todo isto enfróntanos a unha situación que levamos moito tempo a padecer e que dificulta o noso desenvolvemento pleno como pobo no económico, no social, no cultural, no idiomático e no político. A iso contribúe sen dúbida algunha, neste momento, a incompetencia manifesta da Xunta de Galiza e do seu presidente, Alberto Núñez Feijóo, incapaces de ofrecer alternativas e saídas centradas nos intereses das clases populares galegas. Pero tamén inflúe de forma determinante a falta de soberanía política de Galiza e o papel que tradicionalmente xogamos, no contexto do Estado e da Unión Europea, de nación colonizada, espoliada, subministradora de man de obra, materias primas e aforro.

Neste contexto, cobra aínda máis forza a necesidade de termos soberanía política para poder estabelecer os mecanismos axeitados para unha mellor defensa dos nosos sectores produtivos básicos, para modernizar as nosas infraestruturas e servizos sociais, para levar adiante unha política de emprego propia, para potenciar unha economía autocentrada ao servizo e en beneficio da maioría social. A dependencia favorece as desigualdades sociais, discrimina a nosa cultura e lingua, debilita o noso proxecto colectivo, hipoteca o noso futuro individual e social.

 
Rexeitan o Plan de Igualdade do persoal do Concello da Coruña polas súas carencias e por seren pouco ambicioso PDF Imprimir Correo-e
Xoves, 20 Xullo 2017 08:44

A CIG denuncia que a comisión negociadora coa representación sindical creouse co texto elaborado

A sección sindical da CIG do Concello da Coruña amosou o seu rexeitamento ao proceso de elaboración e  aprobación do III Plan de Igualdade de Oportunidades entre Homes e Mulleres do persoal municipal ao entender que contén moitas carencias, ademais de ser “pouco ambicioso”. Ao mesmo tempo denuncian que a comisión negociadora coa representación sindical, que só mantivo tres xuntanzas, foi constituída unha vez que o documento xa estaba elaborado.

Dende a CIG do Concello da Coruña explican que o propio Goberno local admitiu nas reunións da comisión negociadora que o III Plan de igualdade tiña moitas carencias, que era pouco ambicioso, que faltaban datos para a súa elaboración e que se fixo nun prazo excesivamente curto. Aínda así, os responsábeis municipais rexeitaron a proposta da central de reiniciar o proceso de elaboración para que o documento fose feito coa necesaria negociación sindical, de xeito participativo e coa implicación de todo o persoal municipal.

Neste senso, denuncian que a comisión negociadora coa representación sindical creouse cando o documento xa estaba elaborado, ademais de que houbo só tres reunións desta comisión coa escusa da posíbel perda dunha subvención.

“Por todo isto comunicóuselle ao Concello que non apoiariamos o plan, xa que o consideramos totalmente impropio dun Goberno supostamente comprometido coa participación e coa igualdade”, rematan.

 
Alertan sobre a retirada do helicóptero contra incendios do Barco de ValdeorrasO sector de Autonómica da CIG-Administración de Ourense vén de coñecer que a Consellaría do Medio Rural retirou o helicóptero contra incendios que leva operando na base de Vila PDF Imprimir Correo-e
Xoves, 13 Xullo 2017 11:19

A CIG denuncia que se trata dunha zona de orografía complicada e dun alto valor ecolóxico e forestal

O sector de Autonómica da CIG-Administración de Ourense vén de coñecer que a Consellaría do Medio Rural retirou o helicóptero contra incendios que leva operando na base de Vilanova, no Barco de Valdeorras, dende o ano 1992. Na central denuncian que se trata dun dos Distritos cunhas das orografías máis complicadas do país e dun alto valor ecolóxico e forestal e esixen o seu regreso a un enclave fundamental para loitar contra o lume na zona.

Dende a federación de Administración explican que a Base de Helicóptero de Vilanova do Barco de Valdeorras do Distrito XIII, “na que se investiron centos de miles de euros”, atópase a día de hoxe pechada e sen helicóptero, “estando totalmente desaproveitada para a protección do medio e incumprindo o obxectivo para o que fora concibida”.

Lembran que o Distrito XIII ten lugares dunha importancia paisaxística ecolóxica e forestal enorme ,como a Serra do Eixe, con máis de 5000 hectáreas de piñeiro silvestre; o Parque Natural da Serra da Enciña da Lastra, cunha das escasas concentracións de aciñeiras de toda Galiza; así como o Teixedal de Casaio, un dos poucos bosques de teixo existentes en Europa. Tamén sinalan a importancia de enclaves como o Macizo Central, as ribeiras do Bibei, Xares e Návea.

Sosteñen que todos estes espazos naturais contarían cunha altísima protección noutros lugares de Europa, “mentres que aquí quedan ao dispor da sorte se nos remitimos aos datos deste Distrito no que a número de lumes se refire”. Indican que este Distrito é o mais complicado en termos de orografía, humidades relativas medias e temperaturas moi altas, onde a velocidade de propagación é elevadísima, “podendo crear lumes de cuarta xeración cun compoñente convectivo moi importante, o que intensifica a gravidade da emerxencia por lume forestal”.

Arranxo da base e volta do helicóptero

Diante disto, o tempo de reacción é fundamental para poder permitir a capacidade máxima de control de lumes na fase inicial, “xa que despois nas condicións frecuentes de meteoroloxía e orografía na comarca de Valdeorras pode provocar -como así sucedeu- lumes forestais de altísima intensidade e perigo, polo que a presenza do helicóptero nesta zona dende 1992 tiña unha razón técnica de ser”.

Polo tanto, consideran que a retirada desta dotación é un erro moi grave e reclámanlle aos responsábeis da Consellería que “fagan o imposíbel” para arranxar os “supostos problemas” que presenta a citada base e esixen o retorno inmediato do helicóptero de Vilanova.

 
Convocada manifestación en demanda da inmediata convocatoria da OPE no servizo contra incendios PDF Imprimir Correo-e
Xoves, 13 Xullo 2017 11:18

Para o vindeiro venres, día 14 de xullo, ás 10:30 horas, con saída da estación de autobuses de Santiago

CIG e CSIF anunciaron esta mañá en rolda de prensa a convocatoria dunha manifestación para o próximo venres día 14 de xullo, ás 10:30 horas en Compostela, para denunciar o incumprimento do goberno do Partido Popular no que atinxe a oferta de emprego público do ano 2016 para o Servizo de Prevención e Defensa contra Incendios Forestais (SPDCIF), convocada mediante o Decreto 19/2016, publicado no DOG do 07/03/16 e exixir a súa inmediata convocatoria.

Segundo explicaron na rolda de prensa o delegado da CIG en Medio rural en Pontevedra, Xesús Dorado, e o representante do CSIF, Juan Carlos Rivas, é imprescindíbel que se convoque xa Oferta Pública de Emprego (OPE) correspondente ao 2016 como persoal laboral.

Dorado exixiu o cumprimento do acordo asinado en setembro de 2016 entre a Xunta de Galiza e os sindicatos sobre os bombeiros forestais e a súa segunda actividade onde se recolle a redución da taxa de precariedade ou temporalidade que segundo denunciaron “ascende a máis do 40% do dispositivo contra incendios”, mediante as correspondentes ofertas públicas de emprego para prazas de persoal laboral, previo a calquera proceso de funcionarización que se puidera acometer neste ámbito.

Xunto a isto, reiterou a denuncia do incumprimento, por parte da Xunta de Galiza, das súas propias publicacións e acusouna de alimentar a precariedade na propia administración pública, infrinxindo ademais “o compromiso da publicación das convocatorias de oposición a prazas de persoal laboral no SPDCIF”.

Neste sentido, lembrou que agora mesmo forman parte do dispositivo entre 1.800 e 1.900 traballadoras e traballadores, dos que preto de 800 non teñen a condición de fixos. De feito, moitos/as non traballan máis de tres meses en todo o ano o que impide ademais que teñan dereito a cobrar unha prestación por desemprego.

Outra parte importante deses 800, traballan un máximo de 9 meses, o que provoca, segundo Dorado, “unha enorme inseguridade laboral e desprotección”.

Por iso entenden que unha administración pública non pode permitir que parte do seu persoal estea nunha situación laboral como esta e exixen a convocatoria desta OPE que posibilitaría a progresiva conversión en persoal laboral fixo destes traballadores e traballadoras.

Para o representante da CIG, contar con persoal suficiente no dispositivo ao longo de todo o ano permitiría reforzar os labores de prevención durante os meses previos á tempada de alto risco.

Manifestación

A convocatoria da manifestación que terá lugar este venres foi acordada na asemblea de traballadores/as convocada o pasado día 21 de xuño. Unha xuntanza na que tamén se acordou unha recollida de sinaturas entre o persoal do SPDCIF que serán presentadas no rexistro da Xunta coincidindo coa mobilización.

 
Xulgados de Violencia contra a Muller non terán xuíces/as substitutos/as no verán PDF Imprimir Correo-e
Xoves, 13 Xullo 2017 11:17

Terá que asumir o traballo o maxistrado/a que se atope de garda, o que “provocará atrasos”

Os sectores da CIG e CCOO na Administración de Xustiza en A Coruña veñen de denunciar que o Ministerio non vai nomear ningún xuíz substituto no que queda de ano 2017, tal e como confirmou o Director Xeral de Relacións coa Administración de Xustiza onte nunha reunión en Madrid coas organizacións sindicais.

No que respecta a A Coruña, explican que isto supón que o Xulgado de Violencia sobre a Muller vai quedar sen xuíz ou xuíza durante as vacacións do seu titular, que será substituido polo que estea de garda e que este terá que simultanear ambos os dous xulgados.

“Esta situación implica unha perda na calidade do servizo que se lle vai a ofrecer á cidadanía tanto respecto ao servizo do Xulgado de garda (que por si só xa ten traballo abondo) como no que respeta ao Xulgado de Violencia sobre a Muller, no que cada día teñen que atender asuntos de gran complexidade, urxencia e sensibilidade”, aseguran.

Xunto a isto advirten de que isto “provocará atrasos e un peor servizo” ao ter que se encargar un só xuíz ou xuíza dos dous xulgados. Por iso consideran que “é curioso que neste momento de suposta recuperación económica sexa cando se tome esta medida, nunca antes adoptada, e que segue a senda do deliberado empobrecemento e debilitación dun servizo público como é a Administración de Xustiza”.

 
CIG do concello de Santiago denuncia o cese da funcionaria mentres continúa o responsábel político PDF Imprimir Correo-e
Martes, 04 Xullo 2017 11:45

Acusa ao alcalde, Martiño Noriega, de buscar un “chivo expiatorio”

Compostela - 03 Xul 2017

A sección sindical da CIG de Compostela denuncia que o alcalde de Santiago, en lugar de retirar de forma definitiva as competencias ao concelleiro Jorge Duarte, investigado pola fiscalía polos expedientes de disciplina urbanística, o que fixo foi devolverllas ao día seguinte de coñecerse o auto xudicial malia quedar “moi clara a existencia de responsabilidade política”, e cesar á funcionaria responsábel do servizo, como “chivo expiatorio”.

A sección sindical denuncia que tampouco tomou o Alcalde a decisión de deseñar unha nova estrutura organizativa para este servizo e facer as modificacións correspondentes na RPT, tal e como se comprometeu na mesa xeral de negociación e na xuntanza que tivo lugar hai xa seis meses no salón de plenos co persoal adscrito ao servizo.

“Nin unha nin outra; fronte a calquera das alternativas lóxicas polas que podería ter optado o Alcalde, o único que se lle ocurre para atallar os graves problemas de funcionamento deste departamento foi buscar un “chivo expiatorio” e cesar á funcionaria responsable do servizo”, afirma.

Considera que o feito de tentar descargar a responsabilidade dos feitos investigados pola fiscalía sobre a funcionaria, adscribíndoa á Secretaría, a un posto de traballo que non existe, sen competencias nin carga de traballo concreta e nun despacho almacén no soto 2º de Raxoi, “consigue traernos á memoria os tempos e as formas do primeiro alcalde da “era PP”, o ínclito Sr. Conde Roa, quen xa condenara anteriormente á mesma funcionaria ao “ostracismo” nas dependencias do Cersia”.

Con todo, a sección sindical da CIG do concello de Santiago non cuestiona a decisión por ilegal nin por que non sexa habitual, “pois neste Concello as xefaturas de servizo tradicionalmente noméanse e césanse libremente”. Pero non  considera que sexa o máis atinado “limitarse a cortar polo lado máis flebe, mentres se mantén vixente a actual estrutura organizativa do servizo de licenzas e disciplina (que permanece inalterada dende os tempos do primeiro bipartito PSOE-BNG no Concello), ao tempo que se ratifica no cargo ao concelleiro responsable das irregularidades detectadas na tramitación dos expedientes cuestionados”.

Entende que a decisión ten “un certo arrecendo a vendeta”, e deixa en cuestión as garantías xurídicas que deben ser extensivas a todos os actores que interveñen na xestión da disciplina urbanística, e non so a parte dos interesados.

“Actitudes como esta non fan máis que poñer en evidencia a incompetencia para  resolver os graves problemas de funcionamento dos servizos municipais ao tempo que denotan un talante autoritario e vingativo, de quen presume de actitudes abertas e democráticas”.

 
CIG-Área Pública rexeita os orzamentos estatais "que non garanten recuperar os dereitos nin os servizos" PDF Imprimir Correo-e
Mércores, 28 Xuño 2017 15:52

Desenvolveu unha concentración diante da Delegación do Goberno na Coruña

Delegadas e delegados da Área Pública da CIG (Federacións de Administración, Ensino e Saúde) realizaron unha concentración este mércores diante da Delegación do Goberno na Coruña, para reafirmar o rexeitamento aos orzamentos estatais que veñen de ser aprobados e que "non contemplan a reposición de dereitos roubados aos empregados/as públicos nin a recuperación do emprego e, pola contra, afondan no desmantelamento dos servizos públicos".

"A aprobación final dos orzamentos confirma que este ano 2017 vai supor un avance máis na destrución dos servizos e do emprego público. Nestes momento podemos xa desapareceu un 8% do emprego público con respecto ao inicio da crise ", aseverou a voceira da CIG-Área Pública, Maricarme López Santamariña.

Pero con esta mobilización tamén se quere ratificar a oposición ao "Acordo para a mellora do emprego público" asinado por CCOO,UGT e CSIF en Madrid no ámbito das administracións públicas, cuxa parte dispositiva  non vai máis alá "dun lavado de cara para o Partido Popular", ante o incremento das taxas de precariedade no emprego público e as reiteradas sentenzas xudiciais que cuestionan as taxas de reposición impostas nos últimos anos a través da lexislación básica estatal.

Santamariña destacou que este acordo non só non elimina as taxas de reposición (que se manteñen na Lei de Orzamentos do estado para 2017 nun 50% con carácter xeral e no 100% para servizos esenciais), senón que se consolidan "agora co parabén dos sindicatos estatais". A limitación nas taxas de reposición, engadiu, "son a causa principal da extensión da precariedade nas administracións públicas". Unha precariedade da que López Santamariña responsabilizou “á política destrutiva” do PP e que afecta a entre un 30 e un 40% do seu cadro de persoal.

Ler máis...
 
Área Pública mobilizarase contra uns orzamentos estatais "que non garanten os servizos públicos" PDF Imprimir Correo-e
Luns, 26 Xuño 2017 08:33

O mércores 28 de xuño, ás 11:30 horas, diante da Delegación do Goberno na Coruña

Á área pública da CIG (Administración, Ensino e Saúde) ten convocada unha concentración para o mércores 28 de xuño, ás 11:30 horas, diante da Delegación do Goberno na Coruña, coincidindo coa aprobación final dos Orzamentos Xerais do Estado para 2017. Con esta mobilización quérese amosar unha vez máis o rexeitamento a uns orzamentos que non contemplan a reposición de dereitos roubados aos empregados/as públicos nin a recuperación do emprego e pola contra afondan no desmantelamento dos servizos públicos.

Ademais, lembran dende Área Pública, os orzamentos "veñen acompañados e co visto bo" dun acordo en materia de emprego público asinado por CCOO, UGT e CSIF en Madrid no ámbito das administracións públicas, que baixo o nome de "Acordo para a mellora do emprego público" non é máis "que un lavado de cara para o goberno". Neste senso, subliña a Área Pública, este pacto non só non elimina as taxas de reposición de efectivos, senón que as vén consolidar "agora co parabén dos sindicatos estatais".

Xunto, denuncian que ese acordo tampouco posibilita a creación de prazas novas en ningunha das administracións e non contempla nin a recuperación dos dereitos laborais suprimidos nin das condicións salariais recortadas.

Coa mobilización do mércores 28, a Área Pública da CIG dá continuidade ás mobilizacións realizadas anteriormente para rexeitar ao proxecto de orzamentos xerais e contra deste lesivo acordo.

 
Reclaman a inmediata convocatoria da OPE para reducir a ‘escandalosa’ temporalidade do SPDCIF PDF Imprimir Correo-e
Luns, 26 Xuño 2017 08:32

Asemblea na Casa de Cultura de Silleda este mércores ás 17:00h

Representantes da CIG e do CSIF compareceron esta mañá en rolda de prensa para exixir a inmediata convocatoria da OPE como persoal laboral no Servizo de Prevención e Defensa contra os Incendios Forestais da Xunta de Galiza (SPDCIF). Un servizo público no que, segundo denunciaron, a temporalidade afecta ao 40% dos traballadores/as e non se convoca ningunha Oferta de Emprego Público desde o ano 2003. Por iso anunciaron a celebración dunha asemblea informativa á que está convocado todo o persoal, para este mércores, día 21 de xuño, ás 17:00 horas, na Casa de Cultura de Silleda.

Segundo explicou o representante da CIG, Raúl Vázquez, en setembro do pasado ano, as organizacións sindicais chegaron a un acordo coa Xunta de Galiza polo que o 20% das prazas de emprego público, do total das que se ofertaran nos seguintes catro anos, serían para o SPDCIF.

Porén os comparecentes denunciaron que malia existir ese compromiso, anunciado polo propio Presidente da Xunta á saída dunha Consello de Goberno, das prazas convocadas para este ano ningunha é para o SPDCIF. Un “grave incumprimento” porque a OPE de 2016 si foi convocada mediante o decreto 19/2016 no DOG do 7 de marzo.

Ler máis...
 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 2 de 47
Joomla Templates: by JoomlaShack