Federación de Administración Pública da CIG

Federación de Administración Pública da CIG

Ligazóns sectores

Autonómica
Correos
Xustiza

Ligazons confederacion

CIG - Avantar
Forga
Saúde laboral
Fesga

Procurar no web

Novas
Delegados e delegadas da CIG percorren as rúas de Compostela contra a centralización da negociación colectiva PDF Imprimir Correo-e
Mércores, 12 Outubro 2016 09:07

Antes da mobilización analizaron en asemblea as consecuencias das reformas e os avances conseguidos grazas á mobilización

Delegados e delegadas da CIG percorreron esta mañá as rúas de Compostela en defensa da negociación colectiva en Galiza e contra a precarización do mercado laboral. A mobilización tivo lugar tras unha asemblea nacional na que se analizou a situación sociolaboral en xeral e, nomeadamente, a problemática que se dá no ámbito da negociación colectiva. As/os asistentes concluíron que é imprescindíbel reforzar a central sindical como mellor mecanismo para loitar contra a política de recorte de dereitos e o empobrecemento da clase traballadora.
2016-10-11 mani delegados 002

Galería de imaxes da asemblea nacional de delegados/as

Galería de imaxes da manifestación por Compostela

Na asemblea previa á manifestación debulláronse as consecuencias das reformas introducidas na negociación colectiva para, segundo Antolín Alcántara, secretario confederal de Negociación Colectiva e Saúde Laboral, precarizar aínda máis as condicións laborais.

Alcántara denunciou a transferencia masiva das rendas do traballo ás rendas do capital abaratando, na primeira reforma o despedimento; despois modificando as condicións para os EREs e logo mudando as regras da negociación colectiva.

Unhas reformas que, lembrou, acometeu primeiro o PSOE pactando con CCOO e UGT a prevalencia dos convenios a nivel de Estado, para poder decidir “desde Madrid e nas cúpulas” convenios que definiu como “miserentos” para “arrebatarnos a capacidade de mobilizar á clase traballadora e que esta non puidera participar nas negociacións”.

Ler máis...
 
Persoal de Correos mobilízase en Compostela en demanda de máis efectivos para garantir o reparto diario da correspondencia PDF Imprimir Correo-e
Luns, 03 Outubro 2016 11:28
Denuncian que os recortes dos últimos anos reduciron o cadro de persoal e provocaron un incremento da carga de traballo para as traballadoras/es que quedan
Traballadores/as de Correos concentráronse este xoves diante da oficina principal de Compostela para demandar máis persoal de reparto para asumir a carga de traballo que hai na capital de Galiza e resolver a continúa acumulación de correspondencia sen repartir. A mobilización foi convocada pola Xunta de Persoal e o Comité de Empresa.
16-09-30 CIG-Correos

Anxo Álvarez Amado de CIG-Correos explica que esta problemática arrástrase desde que Correos procedeu a recortar o cadro de persoal de reparto en arredor de 20 persoas nos últimos dous anos “sen que houbera un descenso parello da correspondencia e mesmo producíndose un incremento tanto na paquetería a repartir como no número de novas vivendas ás que lle hai que prestar servizo”, matiza.

Isto está a provocar que a carga de traballo para o persoal sexa cada vez maior ficando cada máis correspondencia sen repartir e contravíndose así as directivas comunitarias e lexislación estatal que obriga ao reparto diario, cinco días á semana a todas as vivendas.

Álvarez Amado sinala que esta mobilización é a continuación doutras que se veñen desenvolvendo nos últimos anos por este mesmo motivo e anuncia que “haberá máis protestas nos vindeiros meses se Correos non escoita as demandas da Xunta de Persoal, do Comité de Empresa e do conxunto de traballadores e traballadoras para que se incremente o cadro de persoal de reparto necesario para garantir un servizo de calidade e que cumpra a lexislación vixente nesta materia”.

 
Critican a exclusión da representación do persoal na comisión para o estudo da remunicipalización das bibliotecas da Coruña PDF Imprimir Correo-e
Mércores, 28 Setembro 2016 11:59
CIG-Administración Local subliña que os órganos de representación dos/as traballadoras da empresa e do propio Concello solicitaron en múltiples ocasións seren incluídos
O sector da CIG-Administración Local da Coruña critica que se teña excluído aos órganos de representación do persoal do Concello e á representación das/os traballadoras/es da empresa concesionaria das bibliotecas municipais da Comisión especial que se encargará do estudo da remunicipalización da rede de bibliotecas.
Vista Concello da Corunha

“Amosamos o noso absoluto rexeitamento o   resultado  do proceso de constitución da Comisión Especial para o estudo da remunicipalización da rede de Bibliotecas e da composición  do equipo técnico multidisciplinar que vai informar e asesorar á citada comisión”, sinala Roberto Tizón, responsábel de CIG-Administración Local na Coruña.

Tizón apunta que tanto os órganos de representación do persoal da empresa concesionaria (Eulen) como os das e dos empregados do propio concello solicitaron, en múltiples ocasións, a súa inclusión na equipa técnica de asesoramento da comisión informativa, aínda que fose só “con voz e sen voto”. Igualmente solicitaron á totalidade dos grupos políticos  municipais que apoiasen as súas solicitudes.

Porén, censura, o pasado día 15 constituíase o equipo técnico de asesoramento “excluíndo del aos órganos de representación do persoal, tanto da empresa privada como do propio concello, aínda despois de ter sido anunciado na prensa que formarían parte do mesmo”.

Engade Tizón que, "a excepción do interventor e o persoal das bibliotecas, máis da metade de integrantes son de libre designación”. Ás peticións de representantes dos grupos municipais do para que exista unha participación activa do persoal ou cando menos teñan audiencia, “o alcalde responde que se que  dará audiencia ao persoal de Eulen, mais ignora á representación do persoal municipal”.

“Non podemos dar crédito nin validar a actuación do Goberno municipal neste proceso. A decisión tomada demostra que determinados conceptos que gustan de utilizar (transparencia, participación, empoderamento…) son simples mantras baleiros  que non teñen despois confirmación en feitos. A realidade é que coa súa decisión, o Goberno Municipal impide participar na comisión á representación lexítimas das e dos traballadores da empresa concesionaria e das e dos empregados do propio Concello”, afirma Tizón.

Finalmente, o responsábel comarcal do sector de Administración Local da CIG valora positivamente que o resto dos grupos desen voz ás peticións do persoal,  “mais lamentamos que, conformando a maioría da representatividade nesa comisión,  non intentaran tan sequera forzar unha votación para defender as súas alegacións”.

 
O informe anual do Grupo Correos revela que a empresa prescindiu nun ano de 1152 traballadores/as PDF Imprimir Correo-e
Mércores, 28 Setembro 2016 11:58

A CIG-Correos critica que o único colectivo de persoal que medra “é o dos xefes/as”O informe integrado do Grupo Correos correspondente ao ano 2015 pon de manifesto o continuado recorte de persoal que se está a producir na empresa postal. Segundo destacan dende a CIG-Correos, en tan só un ano reduciuse o número de traballadores/as en 1152 efectivos.

Con respecto ao persoal funcionario, o 31 de decembro do 2014 había no grupo 17.743 funcionarios/as mentres que a 31 de decembro de 2015 quedaban 15.097, é dicir 2.646 menos.

A CIG-Correos destaca tamén que destes/as 50.153 traballadores/as, 42.128 pertencían ao grupo de Operativos (carteiros/as, axudantes, axentes de clasificación, atención á clientela, administrativos/as). “Os 8.025 traballadores e traballadoras restantes pertencen aos grupos de Mandos Intermedios, Xefes/as de Sector, Directivos/as, etc. Este é o único colectivo que aumenta nesta empresa. Ou dito noutras palabras, tócanos a máis ou menos un/ha xefe/a por cada 5 traballadoras/es”, denuncian.

Outros datos recollidos no informe que a CIG-Correos pon de relevo son os que seguen neste cadro:

Ler máis...
 
A CIG reclama a continuidade do persoal de reforzo do verán para loitar contra os incendios forestais PDF Imprimir Correo-e
Mércores, 28 Setembro 2016 11:58
A central critica que a Consellaría de Medio Rural amplíe o alto risco de lume até o 15 de outubro mentres prescinde destes traballadores/as
O sector de Autonómica da federación de Administración da CIG vén de reclamarlle á Consellaría de Medio Rural que decrete a continuidade do persoal de reforzo do verán que pertence ao dispositivo contra incendios. Dende a central critican que o departemento autonómico amplíe alto risco de lume até o 15 de outubro ao tempo que prescinde dos traballadores/as contratados/as durante tres meses.
2016 09 23 MarchaSeagaOfrendaFloralSantiago06

Na CIG-Administración explican que a Consellería do Medio Rural, a través da dirección xeral de Ordenación e Produción Forestal, vén de decretar a continuidade do alto risco de incendios forestais a partir do 1 de outubro, un período que se prolongará até o día 1. Esta ampliación supón que todos os medios continúen activos durante este tempo, “agás o persoal do reforzo do verán, traballadores/as contratados/as directamente por Medio Rural e cunha duración contractual de tres meses”.

Segundo denuncian, esta situación suporá que despois do día 1 o operativo contra incendios non estea en pleno rendemento, contradicindo polo tanto o dito polo vicepresidente da Xunta, Alfonso Rueda, en días pasados, cando publicamente asegurou “que o Goberno galego ía manter activo o operativo especial despregado contra os incendios forestais mentres haxa risco”.

Ler máis...
 
A CIG-Administración Pública avanza as súas propostas e demandas para o futuro Goberno galego PDF Imprimir Correo-e
Sábado, 24 Setembro 2016 11:12

As medidas pretenden recuperar os servizos públicos e a dignidade dos empregados/as

A falta de coñecer o resultado das eleccións autonómicas do vindeiro domingo, a Federación de Administración Pública da CIG vén de presentar as súas propostas e demandas ao futuro Goberno galego e coa vista posta na elaboración do proxecto de Orzamentos da Xunta para o ano 2017. As medidas formuladas teñen como obxectivo recuperar os servizos públicos e a dignidade das empregadas e empregados ao servizo da administración.
autocolante servizos públicos

Aínda que nestes momentos se descoñece quen serán os interlocutores por parte da Administración Autonómica na negociación dos Orzamentos da Xunta de Galiza para o 2017 ou cales serán as liñas xerais da política de xestión do persoal ao servizo das administracións galegas por parte do próximo goberno, “a CIG-Administración si ten vontade negociadora e si cre no dereito da cidadanía a recibir uns servizos públicos universais e de calidade”.

“Do que si temos certeza é da realidade á que nos abocaron durante estes anos aquí en Galiza: destrución de emprego público, precarización das condicións laborais do persoal,  desmantelamento dos servizos públicos e a súa consecuente desaparición ou privatización”, afirma a Secretaria Nacional, Maricarme López Santamariña.

Fronte a esta realidade, a Federación da CIG formula unha batería de propostas que a seguir reproducimos, dirixidas a recuperar os servizos públicos  en Galiza e a dignidade das persoas empregadas públicas:

Emprego público

As limitacións que a lexislación básica do estado impuxo para a reposición de vacantes ano tras ano levou a facer inviábel o mantemento de servizos públicos esenciais para moitas e moitos cidadáns. E a obrigatoriedade da eliminación de prazas vacantes non orzamentadas multiplicou a destrución de emprego.

Non é suficiente coa taxa de reposición do 100 % das vacantes producidas no ano anterior. É preciso abordar un plan de choque para recuperar, cando menos, os niveis de emprego público do ano 2009, recuperar os servizos públicos privatizados e os eliminados e ter uns cadros de persoal que permitan por unha banda ofrecer uns servizos de calidade á cidadanía e por outra banda manter unhas condicións laborais dignas.

Precarización laboral nas administracións públicas

A precarización está instalada nas administracións mediante dous sistemas básicos: a temporalidade e a degradacións das condicións laborais e económicas.

Hai, por parte dos gobernos destes últimos anos, tanto na Xunta de Galiza como no Estado español, unha vontade de precarización sistemática do persoal ao servizo das administracións. Xustificándose na crise económica estableceuse unha política de descrédito dos servizos públicos que lle permitiu ao goberno acadar un dobre obxectivo: mermar as condicións laborais do persoal empregado público, limitando os seus dereitos e atacando a súa independencia profesional e entregar servizos públicos esenciais “ao afán depredador de empresas privadas que teñen como único obxectivo a multiplicación dos seus beneficios económicos”.

"Este camiño de destrución ten que ser abandonado definitivamente. Temos que recuperar e dignificar o emprego público. E para iso hai que instaurar medidas no senso de rematar coa altísima taxa de temporalidade instalada nas administracións e acadar unhas condicións laborais, profesionais e económicas dignas", asevera.

Temporalidade

A Federación propón implentar plans de consolidación de emprego que permitan aproveitar o potencial de moito persoal xa experimentado e ao mesmo tempo regular a súa relación laboral, en moitos casos irregular.

Do mesmo xeito, publicar unha OPE con todas as vacantes, incluídas as que necesariamente deben ser creadas para, cando menos, recuperar os niveis de emprego público do ano 2009.

Revisar o procedemento de provisión de postos

CIG-Administración demanda o restablecemento do complemento por incapacidade temporal que permita manter o 100% das retribucións; a aplicación do dereito á xubilación parcial a todo o persoal; e a cotización do 100% do haber regulador do persoal de Clases Pasivas nos supostos de redución de xornada previstos na lei de igualdade.

No tocante á promoción Interna, o establecemento de procesos de promoción sostíbeis no tempo, que garantan que o persoal que acceda a distinto corpo ou escala de funcionarios/as por este procedemento se lle respecte a localidade de residencia e retribucións.

Entre as propostas tamén se solicita unha revisión dos regulamentos e procedementos para a provisión de postos de traballo do persoal laboral e funcionario, no senso de reducir os procedementos de cobertura de xeito extraordinario (comisións de servizo, adscricións provisionais e adscricións temporais) e regulalos de xeito que permitan a transparencia e a igualdade de oportunidades, incluíndo un sistema de baremación mediante méritos obxectibábeis.

E nesta liña, o establecemento como sistema ordinario de provisión do concurso permanente e aberto que garanta os principios de igualdade, mérito e capacidade, xunto á eliminación dos sistemas de provisión que non garanten estes principios (os denominados concursos especiais).

Condicións económicas

No aspecto económico,a central sindical reivindica un Incremento retributivo xeral acorde co crecemento do Produto Interior Bruto (PIB) e a reposición dos importes das pagas extraordinarias á situación anterior aos recortes. "Consideramos unha inmoralidade a devolución fraccionada en cada campaña electoral da parte das pagas extras, gañada por sentenzas favorábeis ás empregadas e empregados públicos, por parte do goberno de Feijoo", afirma López Santamariña.

Xunto a isto, solicitan fondos para a recuperación do poder adquisitivo perdido dende o ano 2010 e a reposición dos Fondos de Acción Social nos importes anteriores aos recortes.

Administración paralela

A CIG-Administración pon especial atención na utilización por parte das distintas administracións dun sistema específico de precarización do persoal ao seu servizo: a utilización da denominada administración paralela ou administración instrumental. "A través da mesma, mantense ao persoal nunhas condicións laborais e económicas en moitos casos denigrantes. Dentro das administracións hai entes, consorcios ou empresas públicas que non teñen convenio colectivo propio nin se lles aplica o da administración da que dependen. As relacións laborais dentro desta parte da administración regúlanse polo Estatuto dos Traballadores/as, permitindo salarios e condicións laborais moito por baixo do resto do persoal", denuncia a Secretaria Nacional. Por iso, considera que "é preciso unha norma básica que determine que o persoal da administración instrumental ten que ter as mesmas condicións que o resto do persoal".

Sobre o uso do noso idioma, denuncian que non existe unha política pública sobre o uso do galego nas administracións. "Hai que implantar unha política que normalice e garanta o dereito ao uso do noso idioma nas administracións públicas da Galiza".

Situación especial dos/traballadores/as do ámbito da Xustiza

A Xunta de Galiza ven impondo nos últimos anos amortizacións nos cadros de persoal dos xulgados do país. Elimináronse máis de 100 prazas, das cales 24 estaban en xulgados de paz. A isto, compre sumarlle que as últimas oficinas abertas (hai 5 anos que Galiza non recibe ningún xulgado novo) contaron con cadros de persoal minguados.

Esta aposta polo desmantelamento da xustiza, choca coa versión do propio goberno da Administración de Xustiza. A Sala de Goberno do TSXGZ vén de considerar imprescindíbel crear 6 novos xulgados e 2 prazas de maxistrado para órganos colexiados. Unha cantidade que a CIG considera insuficiente.

Dende o sector de Xustiza da CIG-Administración denuncian que a Xunta do PP ten situado a Galiza "á cabeza do Estado no que a recortes se refire". "Dende o ano 2013 até a actualidade, vemos como nos rouban un 40% das extras no CAT (Complemento Autonómico Transitorio); néganse a homoxeneizar o réxime de incapacidades temporais; e enriquécese ilegalmente a conta dos traballadores/as en substitución".

Xunto a isto, o Goberno da Xunta négase a avanzar na implantación da nova oficina xudicial, cando "resulta urxente implantar as Unidades Técnico Administrativas para dar resposta aos problemas organizativos da xustiza galega".

Xulgados de violencia sobre a muller

Estes xulgados, pola materia da súa competencia, teñen unha problemática específica. "Consideramos inadmisíbel a falla de medios humanos, a escasa formación, os medios materiais insuficientes, a ausencia de espazos acondicionados". Por iso, a CIG reclama a creación de novos xulgados especializados nesta materia (en toda Galiza só hai 2, pois o resto teñen tarefas compartidas entre civil, penal, decanato e rexistro civil), formación específica para o seu persoal, a súa dotación con ferramentas informáticas axeitadas e con espazos habilitados para unha atención digna da vítima.

Tamén consideran necesaria unha adecuación salarial acorde co traballo e horario realizado. "Estes puntos son básicos para acadar unha resposta xudicial áxil, cunha mellor información e protección das vítimas", rematan.

 
Concentracións de traballadores/as en edificios xudiciais contra o desmantelamento da Administración de Xustiza PDF Imprimir Correo-e
Xoves, 22 Setembro 2016 13:43

O sector de Xustiza da CIG critica que a Xunta do PP situou a Galiza á cabeza dos recortes nesta materia

As organizacións sindicais con presenza no sector da Xustiza realizaron este mércores concentracións diante de edificios xudiciais da Coruña e Lugo para denunciar o desmantelamento da xustiza por mor das políticas de recortes do PP, alertando da grave falta de medios humanos e materiais para garantir un servizo público de calidade.  Dende o sector de Xustiza da CIG engaden que “non existe unha política pública sobre a Xustiza en Galiza ao servizo da cidadanía”.
16-09-21 Conecentracion Audiencia A Corunha

As protestas realizáronse só na Coruña e en Lugo, xa que as concentracións que estaba previsto desenvolver en Pontevedra e Vigo foron denegadas pola Subdelegación do Goberno, quen alegou incumprimento no prazo de comunicación, "cando en ningunha ocasion anterior, a pesares de tampouco cumprir con ese prazo, se nos denegou nunca un acto deste tipo", sinalan dende CIG-Xustiza.

Porén, a Xunta de Persoal de Pontevedra entende que esta decisión é unha represalia pola denuncia presentada ante a Xunta Electoral Local de Vigo en contra a decisión da Consellaría de Vicepresidencia, Administracións Públicas e Xustiza de publicitar, en plena campaña electoral, o gañador do proxecto da Cidade da Xustiza de Vigo. Denuncia que a Xunta Electoral estimou, obrigando a adiar a data de presentación dos proxectos até despois das eleccións, xa que entende que non se causa ningún prexuízo ao interese público xeral.

Así as cousas, o xoves, as mobilizacións continuarán nas cidades de Ourense e Ferrol.

Ler máis...
 
A CIG mobilizouse contra os acordos de libre comercio que a UE negocia cos Estados Unidos e Canadá PDF Imprimir Correo-e
Xoves, 22 Setembro 2016 13:42

Unha delegación da central nacionalista participou na manifestación convocada por diversos colectivos en Bruxelas

A CIG participou na manifestación que diversos colectivos desenvolveron este martes en Bruxelas para rexeitar a tratado de libre comercio que a UE está a negociar cos Estados Unidos (TTIP) e o que xa ten pactado con Canadá (CETA), cuxa aprobación se agarda para o mes de outubro. De xeito paralelo, a central realizou unha concentración diante da Delegación do Goberno da Coruña para denunciar as lesivas consecuencias que, de aprobárense, terán estes tratados para as nosas condicións de vida.
16-09-20 ManifestacionTTIPCETA-Bruxelas (1)

Galería de imaxes

A mobilización na capital belga estivo convocada por diversas organizacións e colectivos europeos, entre os que están Alter Summit e StopTTIP -entidades das que a CIG forma parte-, e na mesma participou unha delegación da central sindical, encabezada polo seu Secretario Xeral, Xesús Seixo, quen estivo acompañado polo responsábel de internacional da central, Xosé Lois Rivera, e Suso García, da Executiva Confederal da FGAMT-CIG.

Aínda que con estas protestas se busca trasladar o rexeitamento que existe na sociedade cara a estes dous tratados, púxose  especial incidencia no acordo con Canadá, xa que está programada a súa aprobación definitiva ao longo do próximo mes. De feito, o venres desta semana haberá en Bratislava unha reunión de ministros de comercio dos países membros da UE para abordar a posta en práctica do acordo. E, ao longo de outubro, o CETA deberá ser votado polos distintos parlamentos estatais e finalmente ratificado polo Parlamento europeo.

Ler máis...
 
Un tribunal da UE declara ilegal a sucesión de contratos para cubrir prazas estruturais PDF Imprimir Correo-e
Luns, 19 Setembro 2016 09:43

A CIG-Saúde demándalle ao Sergas un plan de emprego plurianual e rematar coas taxas de reposición

Dende a chegada do PP á Xunta en 2009, converteuse en práctica habitual no Servizo Galego de Saúde (Sergas) cubrir as prazas estruturais mediante a sucesión de persoal con contratos temporais. Agora, un tribunal da UE vén de declarar que isto vulnera a normativa europea sobre o traballo de duración determinada. A resolución reforza a demanda da CIG-Saúde a respecto da necesidade de eliminar de vez a taxa de reposición, rematar coa precariedade e que o Sergas sente negociar un plan de emprego plurianual.
12-05-15 concentración CIG-Saúde

A sentenza europea responde a unha cuestión formulada polo xulgado do Contencioso-Administrativo número 4 de Madrid, tras a denuncia presentada por unha enfermeira que, logo de sucesivos contratos para cubrir postos estruturais, foi cesada. O contencioso solicitou  ao tribunal europeo que se pronunciase sobre se a norma española que permite a renovación destes contratos é contraria ao  “Acordo Marco sobre o traballo de duración determinada”, pois o xulgado ten dubidas sobre as razóns obxectivas que poidan xustificar estes nomeamentos.

A resposta resulta clara: “a norma española permite a renovación de contratos de duración determinada para cubrir necesidades permanentes e estábeis, a pesares de existir un déficit estrutural de postos de traballo, e infrinxe o Acordo Marco”. Agora o xulgado de Madrid terá ditaminar na súa sentenza se lle recoñece, ou non,  a esta traballadora  un cesamento indebido e se a declara indefinida non fixa (interina no caso do sector da sanidade).

Neste contexto, a CIG-Saúde lembra que, a pesar do déficit no cadro de persoal, o SERGAS leva anos cubrindo prazas estruturais con contratos temporais, provocando unha elevada precariedade entre os traballadores e as traballadoras. Unha situación que, denuncia a Secretaria Nacional da Federación, María Xosé Abuín, prexudica ao persoal afectado, ao sistema sanitario galego e, polo tanto, aos usuarios e usuarias.

“Que pasará agora, serán os xuíces e as xuízas quen teña que ordenar a contratación no SERGAS porque a administración é incapaz de facelo?”, pregúntase Abuín. “A taxa de reposición non ten sentido, o que ten que facer a administración é negociar un plan de emprego plurianual, determinar que prazas están nesta situación e  que sexan cubertas con interinidades, asignadas seguindo o estabelecido no Pacto de Contratación”, apunta.

Abuín subliña a importancia de respectar o pacto de contratación, xa que é a única vía para garantir que as vacantes sexan ofertadas á persoa que lle corresponda por orde de puntuación. Unha vez convertidas en vacantes todas as prazas estruturais cubertas con persoal eventual, estas ofertaríanse a traslados e OPE para rematar coa precariedade laboral no SERGAS.

 
A CIG-Autonómica valora positivamente o acordo de Bombeiros Forestais e segunda actividade PDF Imprimir Correo-e
Xoves, 08 Setembro 2016 08:31

Considera que mellora as condicións laborais do persoal da Xunta e adianta que seguirán as mobilizacións

O sector da Autonómica da CIG-Administración vén de valorar positivamente o acordo acadado de bombeiros forestais e segunda actividade. Con todo matiza que “como todo acordo, imaxinamos que non contentará a todo o colectivo”. Aínda así detalla de seguido o que vén recoller o texto que foi aprobado na Comisión de Persoal do 5 de Setembro que considera como “histórico para todo o colectivo do SPDCIF”.
incendio forestal 01

Primeiro.- Establece para o colectivo a realidade da súa auténtica profesión. A CIG dende o principio apostou por un servizo profesional público é único e con este acordo entendemos que se apuntala de forma clara a profesionalización do dispositivo, polo tanto somos partidarios de que a consecución da categoría de bombeiro forestal é fundamental.

Dende este sindicato iniciáronse os procedementos do recoñecemento da categoría de bombeiro forestal coa sinatura do V Convenio Colectivo do Persoal Laboral da Xunta de Galiza, onde dende o ano 2008 se fixaban dous puntos fundamentais; o cambio de denominación da categoría a bombeiro forestal e a consideración do SPDCIF como un Servizo de Emerxencias.

No ano 2014 iníciase o estudo da elaboración de Proposicións Non de Leis (PNL`s) para acadar o apoio parlamentar para o cambio da denominación da categoría e os correspondentes dereitos que conleva. Este traballo elabórase non só dende a Galiza senón que tamén se leva o traballo conxunto coa plataforma PASBF para presentar o mesmo tipo de PNL no conxunto do estado.

A CIG leva a primeira PNL en Febreiro de 2015 ao Parlamento Galego, obtendo o apoio da oposición e o voto contrario do PP. Volvemos levalo de novo enOutubro de 2015 e o PP volve a votar encontra. Como anécdota, dicer que o Partido Popular noutras comunidades autonómas votaron a favor do recoñecemento da categoría de bombeiro forestal, argumentando o recollido no R.D. 1591/2010, do 26 de Novembro, pola que se aproba a Clasificación Nacional de Ocupacións (CNO – 2011), mentres eiquí todo o contrario. Seica na nosa Galiza non coñecían o R.D. 1591/2010!!!

Ante a negativa do PP, seguímolo intentando polas vías que temos, denuncia a Inspeción de Traballo, a Seguridade Social, e a un larguísimo etc...

A CIG entende que se establece un diálogo diferente coa administración, cando se produce o troco de conselleira, iniciándose unha negociación con tódolos sindicatos dunha forma moito mais aberta, rematando o proceso despois dunha larga e dura negociación.

Ler máis...
 
A CIG demanda medidas preventivas contra os incendios e esixe a dimisión do director xeral de Ordenación e Produción Forestal PDF Imprimir Correo-e
Xoves, 08 Setembro 2016 08:30

A central denuncia que os lumes están a arrasar milleiros de hectáreas en parques naturais da provincia de Ourense

O sector de Autonómica da CIG-Administración reclámalle á Xunta de Galiza a posta en marcha de medidas de prevención “para paliar a lacra dos incendios forestais” que están a afectar especialmente a provincia de Ourense. Dende a central esixen tamén a dimisión do director xeral de Ordenación e Produción Forestal pola súa incompetencia á hora de xestionar a loita contra os lumes.
15-06-11 helicóptero lume

Dende o sector de Autonómica da federación de Adninistración da CIG denuncian que estes días a provincia de Ourense “está a ser un inferno de lume en concellos coma Oímbra, Muiños, Boborás ou Lobios, nos que xa van arrasadas máis de 3500 hectáreas”.

Segundo explican, as condicións ambientais coma a seca, a calor e o vento que se manteñen de forma prolongada implican unha continúa vaga de incendios de grandes dimensións que fican descontrolados durante varios días. “É evidente a intencionalidade dos lumes, mais a problemática estrutural dos lumes forestais no noso país non se chegou a debater pola falta de interés da Xunta, preocupada en afastar este debate do día a día e logrando confundir a cidadanía con supostas detencións e identificacións de supostos incendiarios/as, que máis tarde son postos/as en liberdade sen cargos”.

Neste senso, critican que que non se teñan tomado medidas preventivas para radicar ou minimizar ao máximo os incendios e lembran que os propios alcaldes dos concellos que integran o Parque Natural Baixa Limia -Serra do Xurés, Lobios, Muiños e Entrimo- xa manifestaran en 2015 que non podían facerse cargo das labores preventivas na zona, precisando medios para acometer a prevención.

Así, sosteñen que a Xunta mantén medios propios no Parque Natural do Xurés, “pero son insuficientes para ter a zona en condicións óptimas para que os incendios forestais que se cheguen a producir non teñan consecuencias dramáticas”. De feito, o Goberno galego mantén un tractor desbrozador inoperativo dende 2015, polo que é imposibél ou inviábel que se realicen medidas preventivas. “Non é de recibo que no parque natural con máis extensión da do país teñan medios dos que non se pode facer uso por mor de avarías.

Ler máis...
 
Correos pecha temporalmente a oficina de Santa Cruz (Oleiros) por non substituír a unha traballadora que está de vacacións PDF Imprimir Correo-e
Xoves, 08 Setembro 2016 08:29

A CIG-Correos denuncia a falta de previsión da empresa para ter suficiente persoal formado nas bolsas de substitución

A CIG-Correos vén de demandar a contratación inmediata dunha persoa para substituír a traballadora que se encarga da apertura da oficina e que está de vacacións. Dende a central denuncian que a falta de previsión da empresa para ter suficiente persoal formado nas bolsas de substitución está a provocar situacións como esta. Unha cuestión que a CIG-Correos xa tiña denunciado previamente “pero dende a empresa fixeron oídos xordos ás nosas propostas”.
16-09-06 Peche oficina Correos Santa Cruz0

Segundo figura no cartel colgado na porta, Correos, por motivos “operativos”, pecha a oficina de Santa Cruz no Concello de Oleiros dende o día 1 até o día 9 de setembro, indicándolles ás usuarias e usuarios que deben dirixirse á oficina de Perillo para facer calquera trámite ou para demandar algún dos servizos que se prestaban dende esta oficina auxiliar.

Neste senso, dende a CIG-Correos da Coruña subliñan que, ademais de obrigar a veciñanza de Santa Cruz e Dorneda a desprazarse até Perillo para retirar calquera tipo de envío certificado ou de entrega personalizada que non puidera entregar o/a carteiro no domicilio, “non podemos esquecer que estamos en plena campaña electoral co aumento da correspondencia que isto significa e que nas oficinas estase solicitando o voto por correo”.

O feito de non ter substituído a titular do servizo que asume a apertura da oficina de 8:45 a 10:45, engade Miguel Ramudo, delegado da CIG en Correos, tamén prexudica ao resto dos traballadores e traballadoras “que teñen que facerse cargo do reparto da zona, a maiores do que lles corresponde”.

“A consecuencia da falta de previsión de Correos é que toda unha poboación como a de Santa Cruz, xunto coa súa zona de influencia, se atope sen estar atendida na oficina da localidade, véndose obrigada a realizar un desprazamento que moitas persoas non poderán facer ou que lles resultará custoso en tempo ou material ou fisicamente”, afirman.

Diante desta situación, a CIG Correos demanda unha solución urxente para este problema “que non pasa máis que por unha contratación inmediata para substituír a traballadora que está de vacacións, cubrindo deste xeito tanto a súa zona de reparto como a apertura da oficina”.

 
O Concello da Fonsagrada despide os traballadores do GES que tivo que readmitir por mandato xudicial PDF Imprimir Correo-e
Xoves, 08 Setembro 2016 08:28

A CIG de Lugo-A Mariña informa que vai impugnar os despedimentos, que a administración executou mediante un ERE de extinción

O Concello da Fonsagrada comunicou o pasado 29 de agosto o despedimento aos 12 traballadores/as do GES que foran readmitidos/as logo de que diversas sentenzas xudiciais declararan nulos os ceses que o goberno local realizara a finais do ano 2015. Para executar esta medida, o Concello aplicou un expediente de regulación alegando causas económicas e organizativas e “converténdose no primeiro do país que leva a cabo un ERE de extinción de contratos, amparado pola reforma laboral aprobada polo PP”.
RecursoGes

A CIG de Lugo-A Mariña explica que para levar adiante este ERE, a administración local “contou tamén coa colaboración dos sindicatos que teñen a representación dos traballadores/as no Concello da Fonsagrada (UGT e CCOO), que asinaron un acordo para despedir aos seus propios compañeiros, logo dun proceso no que non convocaron nin unha soa asemblea de para informar as persoas afectadas”.

O Secretario Comarcal da CIG, Antonio Niño, critica a actuación “de quen participaron nesta negociación” ao entender que houbo “unha actuación continua de prácticas de mala fe. Primeiro iniciando a negociación dun ERE, xusto cando o persoal é reincorporado por mandato xudicial, tratando de evitar fora como fora que regresaran ao seu posto de traballo; logo secuestrando o proceso de negociación, do cal non houbo ningunha información; e finalmente para rematar acordando o despedimento dous días antes de que cumpriran un ano máis de traballo, que lles daría polo menos dereito a máis meses de prestación por desemprego”.

A este respecto, Niño destaca que, a pesares de telo solicitado, non se permitiu participar na negociación a ningún dos traballadores afectados polo despedimento, aos que tampouco se lles facilitou a documentación para poder comprobar as causas alegadas polo Concello.

Dende a CIG de Lugo xa adiantaron que se van presentar as respectivas demandas xudiciais impugnando as rescisións, “pois é evidente que se trata dunha represalia por ter impugnado os despedimentos efectuados en decembro de 2015”. Neste senso, Antonio niño engade que “entendemos que nin as causas económicas, nin a causas organizativas sobre as que se sustenta o ERE son certas”.

A CIG reclamara tamén ao Concello da Fonsagrada que teña a mesma dilixencia para pagar os salarios de tramitación do período que o persoal permaneceu despedido.

 
A CIG esíxelle á Xefatura de Incendios que se respecten os horarios das brigadas municipais de extinción PDF Imprimir Correo-e
Venres, 26 Agosto 2016 11:56
Dende a central denuncian abusos provocados por ordes do SPDCIF
A sección sindical da CIG na Consellaría de Medio Rural en Ourense esíxelle á Xefatura de Incendios que se respecten os horarios das brigadas municipais de extinción de lumes despois de detectar abusos horarios provocados polas ordes emitidas dende o Servizo de Prevención e Defensa contra os Incendios Forestais (SPDCIF).
2010 17 08 lumesOurense

Dende a central explican que tras detectar varios casos de abusos horarios provocados polas ordes que o SPDCIF lles traslada a algunhas brigadas municipais “puxemos en coñecemento da Xefatura estas irregularidades”.

Sosteñen que a fragmentación nos medios de extinción, “a maiores das eivas que se producen no desenvolvemento dos traballos”, fai que convivan brigadas con condicións laborais que o SPDCIF, responsábel e mando único do dispositivo, descoñece ou non executa como debera.

Ademais, lembran que aínda que a Xunta de Galiza, en concreto a Consellería do Medio Rural, non é a responsábel directa da contratación nin da relación laboral cos traballadores/as cando non se trata dos seus medios propios, “si é a responsábel máxima dos medios e da coordinación de todo o dispositivo que se pon ao mando do SPDCIF”.

Así, indican que boa parte Concellos cos que asinan acordos non teñen convenio colectivo, o que fai que á hora de asinar convenios de colaboración os traballadores/as queden ao amparo do que establece o Estatuto dos Traballadores/as remudado o pasado ano 2015 vía Real Decreto Lexislativo 2/2015, de 23 de octubre.

“En boa parte destes contratos establécese que as quendas semanais son de 40 horas, e repártense en cinco días de traballo, o que quere dicir que a xornada non excederá as oito horas”.

Contratos sen horas extras

Segundo sosteñen, esta lexislación non competerá en concellos onde exista convenio colectivo, mais como norma xeral non estará por debaixo do marco que regula o propio Estatuto.

“Non temos coñecemento a día de hoxe de que se asinaran contratos onde se incluíran horas extras, posibilidade que se recolle no Estatuto dos Traballadores/as”.

Neste senso, denuncian que adoita acontecer que dende o SPDCIF se lles ordea a estes traballadores/as facer 12 horas, “como se foran persoal laboral da Xunta rexidos polo V convenio colectivo, pero non é o caso”.

Diante disto, agardan que suceda por descoñecemento, “entendendo as dificultades que poida supoñer para os encargados de establecer as quendas, pero como responsábeis directos do dispositivo non poden ordearlle aos traballadores/as realizar máis horas das que están asignadas por contrato”.

Finalmente, esixen que estas irregularidades se resolvan coa maior brevidade posíbel e que se coordinen as entidades xestoras dos medios para que dende o SPDCIF non se convide a infrinxir a lei e se respecten as quendas tal e como están asinadas por todos os membros, “evitando posíbeis responsabilidades diante dos accidentes que poidan producirse”.

 
O persoal do SPDCIF manifestarase en Compostela o 1 de setembro para denunciar o desmantelamento do servizo PDF Imprimir Correo-e
Venres, 26 Agosto 2016 11:55
Denuncian a precarización das condicións de traballo, a falta de medios materiais e humanos e a inestabilidade laboral que sofren
As organización sindicais CIG, CCOO, CSI•F e UGT veñen de presentar un escrito dirixido á Consellaría de Facenda, tras da ruptura do diálogo por parte da Administración, para que o departamento autonómico volva á mesa de negociación e se aborden e solucionen os graves problemas que afectan ao SPDCIF. Anuncian ademais a convocatoria dunha manifestación, o vindeiro 1 de setembro, ás 11:00 horas, na Praza do Obradoiro.
15-10-01 concentracion SPDCIF 002

As organizacións sindicais denuncian a situación de emerxencia á que o goberno da Xunta levou o Servizo Público de Defensa Contra Incendios Forestais (SPDCIF), co seu desmantelamento paulatino a consecuencia das “políticas de disgregación” dunha parte do dispositivo e a privatización doutra.

Consideran que esta “irresponsable” fragmentación levada a cabo pola Consellería do Medio Rural do dispositivo de prevención e extinción de incendios forestais, a través dun complexo entramado de organismos, empresas e institucións, “está prexudicando gravemente a eficiencia do que sempre foi un servizo público de contrastada eficacia coa única fin de servir a escuros intereses económicos e electoralistas”.

Xunto a isto denuncian a precarización das condicións de traballo, a falta de medios, tanto materiais coma humanos, así como a inestabilidade laboral e profesional á que o goberno da Xunta quere condenar os profesionais do SPDCIF. Unhas condicións que “poñen en grave risco a capacidade do servizo nas tarefas de extinción e prevención de incendios e supón unha gravísima neglixencia por parte dos seus responsables”, aseguran.

Denuncian ademais o incumprimento do Goberno do Partido Popular respecto ao seu compromiso público de recoñecemento da profesión de bombeiro forestal e a súa teima en manter de forma ilegal aos traballadores e traballadoras da extinción de incendios como “peóns forestais e da caza”, o que “impide o acceso do colectivo ao recoñecemento de enfermidades profesionais propias do traballo desempeñado e o recoñecemento dos correspondentes dereitos legais a redución da idade de xubilación”.

Por iso teñen convocada a mobilización do vindeiro día 1 de setembro e reclaman que se retomen as negociacións, entendendo que “só a través do diálogo pode acadarse unha solución satisfactoria para os graves problemas que afectan o SPDCIF”.

 
<< Inicio < Anterior 1 2 3 4 5 6 7 8 9 10 Seguinte > Final >>

Páxina 7 de 48
Joomla Templates: from JoomlaShack.com